Edukasaun Covalima simu reklamasaun hosi profesór volontáriu 204
COVALIMA, 02 marsu 2023 (TATOLI)–Diretór Servisu Edukasaun Covalima, Rui Amarál Suri Seran, hateten Servisu Edukasaun Covalima simu dokumentu hosi profesór na’in-204 ne’ebé hato’o reklamasaun.
Notísia Relevante: MEJD sei simu reklamasaun hosi profesór voluntáriu 1.371
“Ami simu ona dokumentu husi profesór volontáriu na’in-204 ne’ebé hato’o sira-nia reklamasaun mai iha servisu edukasaun Covalima maibé ha’u seidauk lee sira-nia dokumentu,” Rui Amarál Suri Seran hateten ba Agência Tatoli, iha Santa Rosa, kinta ne’e.
Profesór volontáriu sira submete reklamasaun iha oin rua mak hanesan profesór reklama ba nia-an rasik, reklama mós ba ema-ne’ebé durante la hanorin maibé nia naran públika iha Jornál Repúblika.
Profesór volontáriu finaliza ona submete sira-nia reklamasaun, tanba ne’e servisu edukasaun Covalima sei halo verifikasaun, nune’e haruka hikas ba iha nasionál hodi hein desizaun ikus.
Maske iha munisípiu Covalima foin lalais profesór volontáriu na’in-94 sira-nia naran públika iha jornál Repúblika tanba sei iha reklamasaun, maibé dala ruma ema bolun ho termu profesór mate klamar naran sai nunka hanorin iha eskola.
Tuir kritéria haree ba profesór sira-nia durasaun servisu hanesan profesór sira-ne’ebé hahú hanorin iha tinan 2007 to’o 2017, maibé ba sira-ne’ebé foin hahú hanorin iha tinan 2018 mai oin entaun pasiénsia tenke hein tempu seluk.
Profesór volontáriu hahú submete reklamasaun iha loron 15 fulan-fevreiru ne’ebé ramata iha loron 28 fulan-fevreiru tinan 2023.
Antes ne’e, iha loron 15 fulan-fevreiru 2023, profesór volontáriu iha Covalima sira preokupa ho ministériu edukasuan juventude no desportu, tanba profesór volontáriu ne’ebé atu asina kontratu nunka hanorin iha eskola mós naran sai, maibe ema-ne’ebe hanorin nia naran la sai atu asina kontratu.
Jornalista : Celestina Teles
Editór : Cancio Ximenes
