EKONOMIA, BOBONARO, HEADLINE, MUNISÍPIU

IGEADI-Montana Diak normaliza estrada Leo-Lima

IGEADI-Montana Diak normaliza estrada Leo-Lima

Ekipamentu pezadu hosi Institutu Jestaun Ekipamentu Apoiu Dezenvolvimentu Infraestrutura hasai hela ai no rai ne'ebé monu taka metin estrada iha suku Leo-Lima, postu administrativu Balibo, munisípiu Bobonaro, ligasaun hosi Dili mai Maliana. Imajen Tatoli/Sérgio da Cruz.

BOBONARO, 02 marsu 2023 (TATOLI) — Institutu Jestaun Ekipamentu Apoiu Dezenvolvimentu Infraestrutura, Institutu Públiku (IGEADI,I.P, sigla portugés), Brigada Maria Tapo, hamutuk ho kompañia Montana Diak, kinta tuku ne’e hahú normaliza estrada iha suku Leo-Lima, postu administrativu Balibo, ligasaun hosi Maliana ba Dili.

Estrada refere rai taka metin hafoin akontese udan-boot iha kuarta, loron 01 fulan-marsu por volta meudia tuku 12, hodi difikulta movimentasaun transporte públiku no privada inklui ema la’o-ain.

Ekipamentu pezadu hosi Institutu Jestaun Ekipamentu Apoiu Dezenvolvimentu Infraestrutura hasai hela ai no rai ne’ebé monu taka metin estrada iha suku Leo-Lima, postu administrativu Balibo, munisípiu Bobonaro, ligasaun hosi Dili mai Maliana. Imajen Tatoli/Sérgio da Cruz.

Xefe ekipa Brigada Maria-Tapo IGEADI, Costodio Perreira, esplika, loloos servisu ne’e reponsabiliza tomak ba IGEADI tanba hetan orientasaun hosi parte Autoridade Munisípiu Bobonaro, maibé Ministru Obra Públika Abel Pires, orienta fali kompañia Montana Diak mak halo normalizasaun to’o remata.

Notísia relevante: Xefe suku Leo-lima husu IGE normaliza estrada Balibo-Maliana

“IGE nian orsida tenke lori fali ba mota-ain tanba arreadór sira iha-ne’ebá kotu hotu ona, orsida Montana Diak to’o mai ona mantein iha-ne’e. Ida-ne’e ami dudu liu de’it, tanba orsida kompañia Monta Diak mak tama iha-ne’e,” nia katak.

Enkuantu totál ekipamentu pezadu halo hela intervensaun iha estrada refere hamutuk tolu, komposta hosi lwoder ida, buldozer no eksavatór ida.

Iha fatin hanesan, abitante Antonio Perreira, sente kontente tanba parte rua ne’e bele halo intervensaun emerjeésia hodi fasilita movimentasaun tranporte ultrapasa ba-mai to’o fatin destinasaun.

“Ha’u sente tenke iha kombinasaun IGE ho sira parte seluk, buat hanesan di’akliu tau hela de’it materiál sira hanesan ne’e, sé bainhira akontese tán sira bele hola inisiativa urjentimente tenke halo, tanba ne’e di’ak ba hotu-hotu nia interese, agora tempu udan mos ita labele fó sala ba ema ida, maibé nafatin husu ba IGE fatin sira perigozu rai halai ne’e sira tenke mantein prepara ekipamentu,” nia katak.

Horisehik, nia parte viajen hosi Dili mai Maliana to’o iha fatin refere foin tama metru rua, rai iha foho-leten monu tún hotu kedas hodi taka metin estrada.

“Ha’u hein komesa tuku 12,04 to’o 17:30, maibé di’ak tanba IGE sira hola kedas desizaun komesa horisehik kedas, mai normaliza ba oras hira nia laran nune’e fó dalan ba kareta ho motorizada sira-ne’e,” nia akresenta.

Enkuantu tuir obervasaun Agência Tatoli iha terrenu nota katak, tranporte públiku no privada inklui komunidade provizóriu sei paradu hodi hein ekipa rua halo normalizasaun to’o remata hafoin bele asesu hosi Dili mai Maliana.

Notísia relevante: Deputadu sira ‘triste’ haree direta kondisaun estrada Balibo-Maliana

Jornalista   : Sérgio da Cruz

Editór          : Evaristo Soares Martins

iklan
iklan

Leave a Reply

iklan
error: Content is protected !!