DILI, 02 marsu 2023 (TATOLI) – Ministru Obra Públika (MOP), Abel Pires, hatete projetu konstrusaun estrada husi rotunda Comoro to’o Raikotu, munisípiu Dili, la’ós urjénsia tanba kondisaun sei di’ak hela.
“Estrada parte ne’ebá [Rotunda-Raikotu] kondisaun di’ak hela entaun laiha urjénsia atu hadi’ak lalais. [Aleinde ne’e], seidauk implementa projetu ne’e tanba sei iha prosesu negosiasaun ba edifísiu Eskola São Miguel”, ministru informa iha Palásiu Governu.
Projetu konstrusaun estrada ne’e mai hosi orsamentu empréstimu Banku Aziátiku ba Dezenvolvimentu ho orsamentu millaun $5. Projetu reabilitasaun estrada ne’e ho distánsia kilómetru 1,2.
“Tékniku sira halo hela serbisu no daudaun eskola São Miguel mak seidauk bele rezolve. Ne’e mak ita hein hela tékniku sira bá ko’alia”, nia reitera.
Governante ne’e esplika katak problema São Miguel nian mak rai própriu ne’ebé atu troka fali hodi harii edifísiu ba eskola ne’e rasik. “Maibé serbisu ne’e la’ós Ministériu Obra Públika nian mesak, maibé kona-ba ho rai ne’e serbisu hamutuk ho Ministériu Justisa, liuliu Diresaun Nasionál Terra no Propriedade. Bainhira problema sira ne’e rezolve hotu ona ekipa MOP nia tun ona hodi implementa”, afirma.
Notísia relevante: https://tatoli.tl/2021/04/27/kafi-hahu-diskute-projetu-alargamentu-estrada-rotunda-comoro-too-tasi-tolu/
Ministru Abel dehan bainhira seidauk implementa projetu ne’e tanba problema, entaun bele kanaliza fali osan ne’e ba projetu seluk. “Hanesan daudaun projetu ponte lubuk ida iha parte munísipiu Baucau bá Lautém ne’e mós presiza hadi’a, infelizmente osan ba projetu ne’e seidauk prevee, entaun bele kanaliza fali osan ne’e ba fali ne’ebá”, konklui.
Jornalista : Antónia Gusmão
Editora: Maria Auxiliadora
