PPN fó tempu bankada Parlamentár buka konsensu ba eleisaun komisáriu CAC
DILI, 02 marsu 2023 (TATOLI)—Prezidente Parlamentu Nasionál (PPN), Aniceto Longuinhos Guterres Lopes, fó tempu ba bankada Parlamentár sira hodi buka konsensu ba eleisaun komisáriu Komisaun Anti-Korrupsaun (CAC, siglá portugés) foun.
Notísia Relevante: Deputadu abandona plenária to’o dala lima bele lakon mandatu
Prezidente Parlamentu Nasionál, kinta ne’e, hala’o reuniaun ho lidér bankada sira hodi ko’alia ajendamentu eleisaun komisáriu CAC foun ne’ebé adia dala-neen ona iha plenária tanba la prienxe korum ho auzénsia bankada opozisaun liu-liu partidu CNRT.
“Ohin, reuniaun lidér bankada diskute kona-ba eleisaun komisáriu CAC, ne’ebé bankada CNRT ajenda dala-neen ona la mai, maibé ohin depois bankada hotu aprezenta sira-nia preokupasaun to’o ikus Prezidente Parlamentu deside katak bankada sira tenke ko’alia ba malu (konsensu) to’o loron 16 marsu, agora semana rua tan hahú sura hosi ohin,” Sekretária Meza PN, Lídia Norberta, hateten ba jornalista sira hafoin ramata enkontru iha PN.
To’o loron ne’ebé termina semana rua bankada Parlamentár sira hotu haree kona-ba konversasaun ne’ebé akontese.
Sekretária Meza PN ne’e hateten kandidatu ba komisáriu CAC bazeia ba lei sé mak propoin ne’e konpeténsia Governu nian la’ós kompeténsia PN no PN nia kompeténsia mak bainhira simu lista ka pedidu hosi Governu, PN tau iha aprovasaun, maibé presiza prezensa Deputadu 49 ho votu maiória absoluta.
Entaun, nia dehan, ohin reuniaun ne’e bankada CNRT justifika ona tanba sa sira la marka prezensa hodi nune’e labele prienxe korum deliberativu.
“Nune’e, ohin, Prezidente Parlamentu dehan bankada sira sei ko’alia ba malu, karik sira iha kandidatu ruma ko’alia hodi hato’o ba iha Governu, maibé ida-ne’e serbisu Governu nian,” nia dehan.
Nia hateten, Prezidente Parlamentu Nasionál husu ba sira bankada Parlamentár atu halo konversasaun no negosiasaun ba malu hodi bele hakotu tiha kestaun ne’ebé iha.
Kona-ba sansaun ba Depuatadu CNRT ne’ebé auzénsia plenária dala lima tutuir malu, mia dehan hetan sansaun ne’e lei mak regula.
Jornalista : Nelson de Sousa
Editór : Cancio Ximenes
