BAUCAU, 03 marsu 2023 (TATOLI) – Primeiru-Ministru (PM), Taur Matan Ruak, hatete sei hala’o reuniaun ho Prezidente Repúblika (PR), José Ramos Horta, bainhira iha asuntu importante.
“Ha’u hanoin lahasoru Prezidente Repúblika la’ós de’it dala-rua, maibé dalabarak ona. Ha’u bá Austrália, Indonézia, no Singapura laiha, no ha’u filafali mai laiha. Ha’u aviza ba nia [Horta] katak ha’u só iha asuntu importante mak ha’u bá, kuandu laiha entaun laiha nesesidade atu ha’u bá”, Taur dehan hafoin observa direta projetu reabilitasaun estrada iha munisípiu Baucau, sesta ne’e.
Matan Ruak afirma hanesan Primeiru-Ministru tau-matan bá órgaun Estadu ne’ebé iha nia kompeténsia no define ona iha Konstituisaun, hanesan mós Prezidente Parlamentu, Prezidente Repúblika no Prezidente Tribunál Rekursu.
“Entaun ida-idak iha nia knaar tuir Konstituisaun. Iha momentu balun tenke informa ba malu, tenke ko’alia kona-ba oinsá mak ita-nia nasaun ne’e bá oin. Ne’ebé, kuandu ha’u iha asuntu naturalmente marka enkontru ho Prezidente”, katak.
Notísia relevante: Primeiru-Ministru auzente iha reuniaun ho Prezidente Horta tanba seidauk tama serbisu
Jornalista: Antónia Gusmão
Editora: Maria Auxiliadora
