PR Horta dezloka ba Qatar no Azerbaijaun

DILI, 03 marsu 2023 (TATOLI)—Prezidente Repúblika (PR), José Ramos Horta, sesta ne’e, akompañadu hosi Ministra Negósiu Estranjeiru no Kooperasaun (MNEK), Adaljiza Magno, Ministru Finansa, Rui Augusto Gomes ho delegasaun, dezloka bá Qatar ho Azerbaijaun.
Notísia Relevante: PN autoriza PR Horta dezloka ba Qatar-Azerbaijaun
Vizita Xefe Estadu ho delegasaun bá nasaun Azerbaijaun ne’e simeira Xefe Estadu no mós iha enkontru ministeriál ba Least Developed Countries-LDC ne’ebé Timor-Leste mós hola parte ba.
“Ba Qatar ho Ministra Negósiu Estranjeiru, Ministru Finansa, tanba simeira ne’e Xefe de Estadu no mós ministeriál ba LDC rai Timor halo parte ne’e,” Prezidente Repúblika, José Ramos Horta, hateten liuhosi nota imprensa ne’ebé Agência Tatoli asesu, sesta ne’e.
Ramata vizita ba Qatar, Prezidente Repúblika mós sei hala’o vizita semi-ofisial ba nasaun Azerbaijaun, hodi partisipa iha konferénsia internasionál kona-ba polítika internasionál no seguransa mundiál no sai oradór xave iha konferénsia refere.
Aliénde ne’e, Ramos Horta sei hasoru malu ho Xefe Estadu Azerbaijaun nian, IIham Aliyev.
“Azerbaijaun ne’e rai ida riku boot teb-tebes, ne’e hanesan semi-ofisial, tanba ha’u ba konferénsia ida kona-ba polítika internasionál, seguransa mundiál, ha’u hanesan key note speaker ida iha ne’ebá. Sei hasoru sira-nia Prezidente mais la’ós vizita ofisial, rai ne’e riku boot loos,” Horta hateten.
Entretantu, iha loron 28 fulan-fevereiru 2023, Parlamentu Nasionál aprova pedidu viajen Xefe Estadu nian ba nasaun Qatar ho Azerbaijaun ne’e ho votu a-favór 43 kontra ho abstensaun zero.
Xefe Estadu ho delegasaun hahú dezlokasaun iha loron 3 to’o 14 fulan marsu 2023 hafoin fila hikas mai Timor-Leste.
Jornalista : Nelson de Sousa
Editór : Cancio Ximenes

