DTT Bobonaro husu inan-aman kontrola oan kondús karreta-motorizada
BOBONARO, 06 marsu 2023 (TATOLI) – Diretór Transporte Terrestre (DTT), João Paulo Henriques Baptista, husu ba inan-aman sira atu kontrola oan sira ho idade menoridade kondús tranporte hanesan motorizada no karreta iha estrada públiku tanba bele akontese asidente tráfegu inklui amesa ba ema seluk nia vida.
Nia subliña, dekretu lei kódigu estrada permite ba sidadaun ne’ebé atinje idade tinan 17 mak bele kondús karreta no motorizada.
Maibé durante ne’e oberva katak iha menoridade sira barak mak sei kontinua kondús karreta ho motorizada hodi kontra regra ne’ebé estabelese ona.
Notísia relevante: Viola kódigu estrada, PNTL Bobonaro halo apreensaun ba motór 21
“Ida-ne’e inan-aman tenke konsiente katak, buat ida estrada ne’e ita uza tenke tuir regra, ne’ebé ita labele fó karreta ho motorizada ba ita-nia oan sira atu lori sein kompleta kondusaun no kumpre prosedimentu administrativa hodi hetan lisensa kondusaun,” nia katak.
Diretór ne’e akresenta, bainhira inan aman sira autoriza oan kondús tranporte signifika sira rasik mak kontribui ba asidente inklui infrasaun tanba lei la permite labarik kiiik idade 16 mai kraik lori karreta ho motorizada.
Xefe Seksaun Tránzitu Polísia Munisípiu Bobonaro, Sarjentu Xefe João Belo, reforsa durante ne’e membru sira liuhosi atividade pasa-revista iha terrenu identifika katak, labarik estudante sira iha Maliana barak mak kondús tranporte la ho karta kondusaun.
Maibé komandante ne’e esplika, kódigu penál artigu 207 dehan, sidadaun ne’ebé mak utiliza ka kondús motorsiklizmu sein karta kondusaun sei hetan pena prizaun tinan rua no selu multa.
“Ne’ebé karik ba oin kondús, ita sei bolu inan-aman mai hodi fó xamada atensaun, nune’e labele autoriza labarik sira kondús motorizada bo karreta,” nia fó hanoin.
Notísia relevante: Viola kódigu estrada, PNTL Bobonaro halo apreensaun ba motór 21
Jornalista: Sergio da Cruz
Editór: Evaristo Soares Martins
