Embaixadór koreanu husu traballadór timoroan obedese ba Lei Traballu
DILI, 06 marsu 2023 (TATOLI) – Embaixadór Koreia Súl iha Timor-Leste, Shin Man Taek, husu ba traballadór timoroan sira ne’ebé daudaun serbisu no hirak ne’ebé foin atu bá nasaun refere tenke obedese ba Lei Traballu Koreia nian ne’ebé vigora, nune’e labele hamosu problema entre traballadór no empregadór.
“Kona-ba kontrolu ba traballadór tanba sira asina kontratu direta ho empreza sira maka ein prinsípiu empreza mak kontrola, maibé Koreia mós iha Lei Traballu ne’ebé mak di’ak tebtebes no Embaixada Koreia nafatin haree tuir karik iha violasaun ba lei ruma parte rua serbisu atu husu empreza sira hakru’uk ba lei ne’ebé iha”, Shin Man Taek hatete hafoin reuniaun ho Xefe Governu, iha Palásiu Governu, segunda ne’e.
Embaixada husu ba Governu Timor-Leste atu sensibiliza ba traballhadór sira kona-ba Lei Traballu Koreia nian, nune’e sira bá serbisu bele la’o tuir lei ne’ebé vigora.
Nia dehan Koreia no Timor-Leste amigu di’ak tebes tanba ne’e Koreia komprometidu apoia Timor-Leste iha área sira ne’ebé nasaun presiza hodi dezenvolve país iha futuru.
“Ami diskute kona-ba esperiénsia ne’ebé Koreia iha, liuliu oinsá Koreia ultpasa ninia prosesu ba independénsia to’o mai prosesu dezenvolvimentu. Agora daudaun Timór mós ultrapasa ona funu no agora iha etapa independénsia, entaun oinsá ami ko’alia bele réplika esperiénsia sira ne’ebé Koreia iha mai iha Timor-Leste”, nia afirma.
Durante hasoru malu ne’e, Embaixadór relata mós ba Xefe Governu oinsá atu haruka traballadór timoroan barak liután bá serbisu iha Koreia. Governu koreanu deside tiha ona tinan 2023 hasa’e tan kouta bá traballadór timoroan sira, tanba iha 2022 simu traballadór na’in-500 no tinan ne’e hasa’e ba rihun ida.
Tuir dadus hosi Diresaun Nasionál Empregu Esteriór, traballadór ne’ebé serbisu iha Koreia Súl desde tinan 2009 hamutuk 5.006, hirak ne’ebé fila 973, sei iha nasaun refere 4.033 no lakon vida na’in-10.
Notísia relevante: SEFOPE sei halo levantamentu dadus ba eis-traballadór Austrália no Koreia Súl
Jornalista: Antónia Gusmão
Editora: Maria Auxiliadora
