DILI, 06 marsu 2023 (TATOLI)-Deputadu hosi Bankada KHUNTO no atuál Vise Prezidente Parlamentu Nasionál (PN), Luis Roberto, husu lideransa Partidu polítiku hotu (Parpol) atu kontrola linaguajen iha tinan polítiku.
Notísia relevante:Parpol tenke aprezenta programa rekuperasaun ekonómika iha Eleisaun Parlamentár 2023
“Agora tinan polítika, ha’u husu ba lideransa polítika hotu-hotu atu tuun ba baze bele fa’an programa karik ita kontrola nafatin ho ita-nia linguajen kria nafatin unidade nasionál hodi bele kria pás no estabilidade hodi taxa partisipasaun agora eleisaun parlamentár la’o di’ak’’, Deputadu KHUNTO, Luis Roberto, hato’o liu hosi reuniaun plenária PN, segunda ne’e.
Nune’e, Nia hateten KHUNTO ezije ita lideransa partidu ninian tun iha baze la’os hatun no hasa’e malu hodi hatun malu, maibé presiza hakribi ida ne’e.
“KHUNTO hakribi ida ne’e, demokrátikamente sidadaun se de’it atu tama iha partidu a ka b ne’e direitu sira-nian, regra demokrásia, konstituisaun, importante mak ita-nia étika moral polítika tenke iha, linguajen tenke kontrola tanba ita-nia linguajen mak halo ita sai lideransa” Nia hateten.
Tanba ne’e, partidu KHUNTO apela nafatin ba partidu sira hotu atu kontrola liaguajen hodi hametin pás.
Jornalista: Nelson de Sousa
Editór: Rafael Ximenes de A. Belo
