DILI, 06 marsu 2023 (TATOLI) – Embaixadór súl-koreanu iha Timor-Leste, Shin Man Taek, sujere ba Governu Timor-Leste atu hadi’ak liután iha área informasaun no teknolojia (IT) molok adere ba Organizasaun Sudeste Aziátiku (ASEAN, sigla inglés).
“Apoia ida mak presiza kapasitasaun ba rekursu umanu, liuliu iha setór públiku no tenke iha koñesimentu oinsá organiza eventu internasionál sira tanba reuniaun ASEAN nian sei hala’o barak iha Timór, entaun presiza iha plataforma eletrónika ida di’ak. Tanba ne’e presiza tau-atensaun ba iha área informasaun no téknolojia para bele iklina-aan iha ASEAN”, Shin Man Taek hatete hafoin reuniaun ho Xefe Governu, iha Palásiu Governu, segunda ne’e.
Embaixadór ne’e akresenta katak Governu koreanu prontu apoia Timor-Leste hodi adere ba ASEAN.
“Hamutuk ho Primeiru-Ministru diskute maka oinsá Koreia ninia prontidaun hodi ajuda Timor-Leste nia preparasaun ba adezaun ba ASEAN. Apoia sira hanesan kapasitasaun rekursu umanu ne’ebé Koreia hein hela bainhira Governu Timor-Leste hato’o pedidu”, nia dehan.
Ezekutivu Koreia garante katak bainhira Timor-Leste adere ona ba ASEAN dezenvolvimentu sei sai di’ak liután.
Lembra katak Sekretariadu ASEAN hosi Jakarta, Indonézia, foin lalais kapasita ofisiál sira hosi liña ministeriál iha pilár ekonómiku. Hosi formasaun sira ne’e realiza atu Timor-Leste prepara aan di’ak liután hanesan membru plenu ba iha organizasaun refere.
Notísia relevante: Sekretariadu ASEAN kapasita ofisiál liña ministeriál sira iha pilár ekonómiku
Jornalista: Antónia Gusmão
Editora: Maria Auxiliadora
