Deputada CNRT preokupa ho estoke ai-moruk menus
DILI, 07 marsu 2023 (TATOLI)—Deputada hosi bankada Congresso Nacional de Reconstrução Timorense (CNRT) iha Parlamentu Nasionál (PN), Virgina Ana Belo, preokupa ho estoke ai-moruk menus iha fasilidade saúde balun, nune’e husu Ministra Saúde atu tau atensaun.
Notísia Relevante: Estoke aimoruk item 59 mamuk iha SSMM
“Estoke ai-moruk iha sentru saúde sira iha Timor laran tomak hahú menus ba beibeik no ba ai-moruk sira esensiál laiha tiha ona. Sira (pasiente) hetan reseita hodi ba sosa iha farmásia maibé realidade presu ai-moruk iha farmásia sira-ne’e aas tebes to’o nia diferensa iha tinan kotuk ho agora ninia diferensa boot tebe-tebes,” Deputada Virgina Ana Belo levanta liuhosi reuniaun plenária PN, tersa ne’e.
Nune’e, nia husu ba VIII Governu KOnstitusionál atu kontrola hela ai-moruk sira iha farmásia.
“Se iha ospital estoke ai-moru laiha ona, labele fornese ba ita-nia populasaun sira gratuitamente no obriga sira ba sosa. Ita tenke kontrola presu iha farmásia, nune’e ema sira bele iha kapasidade ba sosa,” nia dehan.
Deputada CNRT, Maria Barreto, hateten kona-ba situasaun saúde iha Timor-Leste nune’e nia parte sekunda ho preokupasaun deputadu sira seluk foti kestaun menus ai-moruk.
Nia dehan, klaru katak Timor-Leste agora hasoru estoke-aut ai-moruk persentajen ne’ebé mak boot, ida-ne’e inklui Ospitál Nasionál Guido Valedares (HNGV), ospitál referál sira, sentru saúde no postu saúde iha área remota.
“Se ai-moruk esensiál mak laiha ona, satan aimoruk espesialista nian, realidade ita husu ba sira moras aas liu iha ita-boot sira-nia bairru, kuaze hotu-hotu hatete moras infesaun vias respiratóriu ka iis boot. Maibé salbutamol de’it laiha ne’e óinsa, ne’e la’ós akontese de’it iha HNGV maibé to’o mós iha postu saúde sira,” nia dehan.
Deputada hosi bankada opozisaun ne’e kestiona situasaun ne’ebé akontese hodi fó hanoin ba Governu liu-liu Ministra Saúde atu tau atensaun ba ai-moruk ne’e estoke-out ne’e.
Hatán ba ida-ne’e, Ministru ba Asuntu Parlamentár no Komunikasaun Sosiál (MAPKOMS), Francisco Jerónimo, hateten relasiona ho situasaun ai-moruk ne’e nia parte sei toma nota no sei ko’alia ho Ministra Saúde atu haree kestaun ne’e hodi fó solusaun ba problema sira-ne’ebé iha.
Jornalista : Nelson de Sousa
Editór : Cancio Ximenes
