Membru PN husu MJ rezolve lalais problema kaderneta passaporte
DILI, 07 marsu 2023 (TATOLI)—Deputada hosi bankada Congresso Nacional de Reconstrução Timorense (CNRT) iha Parlamentu Nasionál (PN), Virginia Ana Belo, husu Ministéiru Justisa (MJ) atu rezolve lalais problema kona-ba laiha kaderneta passaporte komun hodi fó atendimentu ba sidadaun sira.
Notísia Relevante: MJ kontrata empreza halo produsaun kaderneta passaporte
“Kaderneta passaporte komun ne’ebé fulan ida liu ona, ema barak hakarak atu hetan passaporte hodi ba rai-li’ur liu-liu ba estudante ne’ebé sira fila mai feriadu no hakarak ba fali kontinua sira-nia eskola, maibé kaderneta passaporte komun hotu to’o ohin loron,” Deputada CNRT, Virginia Ana Belo, levanta liuhosi reuniaun plenária PN, tersa ne’e.
Nia dehan, ida-ne’e difikulta tebes estudante sira-ne’ebé hakarak atu ba rai-li’ur hodi kontinua estudu.
Deputadu CNRT, Domingos Caravalho, hateten daudaun ita-nia sidadaun joven sira-ne’ebé hakarak sai ba li’ur tanba rona informasaun Austrália prontu simu tan ita-nia ema 8000 atu ba serbisu iha ne’eba, maibé sira-ne’ebé passaporte laiha atu trata iha difikuldade.
“Agora, halo nusa mak kaderneta ne’e mai lalais hodi fasilita sira, tanba iha ne’eba antrian, maibé horsisehik ba iha ne’eba ministériu haruka fila hotu tanba kederneta laiha. Ida-ne’e orsamentu mak laiha ka kaderneta mak seidauk mai, husu Ministéiru Justisa atu bele haree,” nia hateten.
Hatán ba ida-ne’e, Ministru Asuntu Parlamentár no Komunikasaun Sosiál (MAPKOMS), Francisco Jerónimo, hateten relasiona ho kaderneta passaporte ninian la’ós problema orsamentu mak laiha maibé osan no kondisaun hotu iha no agora empreza ne’ebé manán ne’e mak seidauk hatama dokumentu ne’e mai, tan ne’e ita sei hein no nia emprime iha rai-li’ur.
Notísia Relevante: MJ komunika ona Empreza Internasionál rezolve problema kaderneta passaporte
Jornalista : Nelson de Sousa
Editór : Cancio Ximenes
