DILI, 07 marsu 2023 (TATOLI) – Xefe Sentru Saúde Formoza Jaime dos Reis, dehan pasiente sira ne’ebé mak ho moras baibain la presiza ba Hospitál Nasionál Guidu Valadares (HNGV) maibé iha Sentru Saúde Formoza disponível atu fó atendimentu ne’ebé efetivu.
“Karik ita haree mak tau soru de’it ka ita haree hanesan atendimentu baibain, Sentru Saúde Frormoza pronto fó tratamentu saúde ba sira, bainhira HNGV transfere mai fali iha ne’e tanba ita nia médiku sira hamutuk 150-resin. Ida ne’e fatin sufisiente hela hodi fo atendimentu ba sira”, Jaime dos Reis, hateten iha nia kna’ar fatin Formoza, ohin.
Nia husu ba pasiente sira ne’ebé mak konsluta ka baixa iha HNGV katak karik kondisaun la grave bele mai fali iha formoza tanba profisionál saúde hamutuk 150-resin mak iha ne’e atu fó tratamentu saúde ba sira.
Xefe Ermerjénsia HNGV, Eldegar Lopes Martins, dehan pasiente sira ne’ebé nakonu hotu iha sala emerjénsia, médiku sira sei identifika ba kazu ne’ebé kamaan hanesan dengue no moras seluk atu transfere mai Sentru Saúde Formoza no Vera Cruz hodi halo tratamentu, atu fo espasu ba médiku sira iha HNGV hodi foku ba kazu ne’ebé grave.
“Pasiente sira nakonu ona iha HNGV, ami haree ba kazu ne’ebé mak kamaan sei trasfere fila fali ba Vera Cruz no Formoza hodi halo tratamentu iha ne’ebá”, Eldegar konklui.
Jornalista : Felicidade Ximenes
Editór : Zezito Silva
