DILI, 06 marsu 2023 (TATOLI)—Parlamentu Nasionál (PN), tersa ne’e, aprova ona proposta-lei númeru 49/V (5a)-Lei Programasaun Militár iha finál globál ho votu a-favór 45, kontra no abstensaun 0.
Notísia Relevante: PN aprova proposta-lei Programasaun Militár iha faze jeneralidade
“Proposta lei Programasaun Militár Parlamentu Nasionál aprova tiha ona, no agora komisaun B halo hela redasaun finál iha uitoan no orsida lorokraik bele envia ba meza Prezidente Parlamentu Nasionál hodi bele haruka ba Prezidente Repúblika hetan promulgasaun,” Prezidente Komisaun B trata asuntu Negósiu Estranjeiru no Defeza ho Seguransa, Deputadu José Agostinho Sequeira ‘Somotxo’, informa ba jornalista sira iha PN.
Antes ne’e, Ministru Defeza (MF), Filomeno Paixão de Jesus, hateten prezente proposta-lei Programasaun militár enkudramentu orsamentu despeza públika relativa ekipamentu armamentu, impaktu direitu edifikasaun kapasidade militár nesesáriu sustenta forsa nasionál no kumpre misaun iha F-FDTL.
“Proposta-lei programasaun militár sai prinsipál referensiadu fianseiru ba orientasaun levantamentu kapasidade médiu no longu prazu kona-ba diretiva polítika estruturante ho objetivu moderniza, operasionaliza sistema forsa nasionál,” nia hateten.
Planu estratéjiku dezenvolvimentu 2011-2030 ne’ebé afirma meta to’o 2030, F-FDTL iha kapasidade ho responde efikásia multiplu konpromisu militár.
Tuir Governante ne’e katak, programa oitavu Governu estabelese mós ho aprovasaun konseitu estratéjiku defeza no seguransa nasionál, defeza no simentar edifísiu estruturante planeamentu estratéjiku konsolida diretiva ministeriadu planeamentu defeza militár.
Nia dehan, konseitu estratéjiku militár misaun F-FDTL sistema dispositu forsa propor proposta-lei Programasaun militár ho dalan modernizasaun iha profesionalizasaun F-FDTL.
“Ho sentidu ne’e, lei Programasaun militár fundamentál la’ós de’it ba dezenvolvimentu F-FDTL hanesan forsa konvensionál moderna. Maibé ba mós futuru ba ita-nia nasaun hanesan Estadu direitu demokrátiku soberanu no indepedente ba kontribui internasional pás no seguru,” nia hateten.
Entretantu proposta-lei ne’e iha artigu hamutuk 22, hahú hosi espozisaun motivu, Kapítulu I Dispozisaun jerál ho nia artigu haat (4), Kapítulu II Prosesu programasaun ho artigu ualu (8), Kapítulu III Ezekusaun Lei Programasaun Militár ho artigu lima (5), Kapítulu IV Revizaun ho artigu rua (2), Kapítulu V Dispozisaun komplementár no finál ho artigu tolu (3).
Jornalista : Nelson de Sousa
Editór : Cancio Ximenes
