DILI, 07 marsu 2023 (TATOLI) – Ministériu Transporte no Komunikasaun (MTK), liuhosi Diresaun Nasionál Transporte Marítima (DNTM) haruka fila ona ró Ocean Star ba nasaun orijen (Indonézia).
Ministru Transporte no Komunikasaun, José Agustinho da Silva, hateten ró ne’e para kle’ur iha tasi Timór, liuliu iha área Dili nian, tanba ne’e maka momentu ne’ebá orienta parte relevante atu tau-atensaun tanba bainhira para kle’ur iha tasi-laran sei fó impaktu.
“Bazeia ba rezultadu katak ró bele filafali bá nasaun orijen. Sira kumpre ona sira-nia dever administrasaun ho Autoridade Portuária Timor-Leste (APORTIL) no Autoridade Aduaneira”, Ministru Transporte ne’e hateten hafoin reuniaun ho Xefe Governu, iha Palásiu Governu, tersa ne’e.
Sorin seluk, Diretór Nasionál Transporte Marítima, Alberto Freitas Pereira, konfirma katak DNTM hasai lisensa viajen ba ró Ocean Star fila bá nasaun Indonézia iha loron 27 fevereiru.
“DNTM hasai lisensa viajen iha 27 fevereiru, maibé tanba anin-boot entaun sira lakonsege bá no iha 28 fevereiru mak sira hahú viajen no agora to’o ona iha sira-nia fatin Jawa Timur-Indonézia”, nia afirma.
Lembra katak empreza Niaga Shipping International hosi Indonézia haruka, iha dezembru tinan kotuk, ho tripulante hamutuk 14 hodi hadi’a ró Ocean Star hosi ne’ebé para de’it iha tasi-laran iha área Lecidere. Ró ne’e to’o iha Dili iha 04 abril 2021, iha tempu inundasaun no covid-19 nia laran.
Notísia relevante: Manutensaun ba ró Ocean Star ramata no bele dezloka bá nasaun orijen
Jornalista: Antónia Gusmão
Editora: Maria Auxiliadora
