iklan

NASIONÁL, EKONOMIA, HEADLINE, POLÍTIKA

Manutensaun ba ró Ocean Star ramata no bele dezloka bá nasaun orijen

Manutensaun ba ró Ocean Star ramata no bele dezloka bá nasaun orijen

Ró-ahi Ocean Star. Imajen Tatoli/Francisco Sony

DILI, 14 fevereiru 2023 (TATOLI) – Diretór Nasionál Transporte Marítima (DNTM), Alberto Freitas Pereira, afirma ekipa téknika ramata ona halo manutensaun ba ró Ocean Star ne’ebé avaria no daudaun iha ona kodisaun di’ak, nune’e bele dezloka ona bá nasaun orijen.

Nia esplika, iha 28 janeiru 2023, ekipa konjunta kompostu hosi DNTM, Ministériu Transporte no Komunikasaun, Polísia Nasionál Timor-Leste (PNTL), Unidade Polísia Marítima (UPM), Polísia Siéntifika Investigasaun Kriminál (PCIC), Autoridade Portuaria Timor-Leste (APORTIL), Autoridade Aduaneira, Serbisu Informasaun Polísia (SIP-PNTL), Ajénsia Ariana, reprezentante empreza PT. Niaga Shipping International akompaña ró Ocean Star hala’o sea trial durante oras rua ho distánsia 6 nautical mail (ka kilómetru 11.112) ho velosidade 6 knots.

Ho rezultadu observasaun direta ba sea trial ne’e, ekipa konjunta relata katak kondisaun jerál ró nian kompostu hosi mákina prinsipál ida ho marka RPM 130, mákina auxiliaria tolu, rádio komunikasaun, anchor karuk no loos, eletrisidade, bomba koneksaun ba mina, oléu no bee, fire pum emergency, tanke, deck, fatin akomodasaun no seluk tan ho kodisaun di’ak.

“Ekipamentu sira ne’e nia kondisaun di’ak hotu. Ró ne’e 100% di’ak ona no tuir despaxu Ministru Transporte nian katak bele bá ona nasaun orijen”, diretór nasionál informa ba Agência Tatoli, iha Motael, tersa ne’e.

Molok dezloka, ró na’in tenke kumpre regra administrativa sira hodi selu taxa ba APORTIL no Alfándega. “Maibé ho APORTIL sira selu hotu ona no hein de’it Alfándega. Daudaun sira trata hela prosesu ne’e. Tuir despaxu Ministru katak empreza selu ba APORTIL hamutuk rihun $148”, nia adianta.

Sorin seluk, Komisáriu Autoridade Aduaneira/Alfándega, José António Fátima Abílio, realsa katak seidauk bele define loloos valór osan ne’ebé empreza atu selu, tanba sei analiza uluk dokumentu mak foin bele deside.

“Bainhira ró ida tama sempre iha relatóriu in work no ró fila tenke iha relatóriu out work. Bainhira ró Ocean Star tama mai depois mosu problema, entaun pedidu rejime nia seidauk halo, maibé nafatin konsidera katak náviu ruma mak tama mai ne’e presiza iha importasaun temporária”, nia esplika.

Tanba ne’e, empreza hasoru ona Autoridade Aduaneira no esplika ba sira katak tenke selu kustu administrativu balun relasiona ho importasaun temporária ne’e.

“Sira sei fornese dokumentu mai. Espera katak bele koklui antes para sira bele halo dezlokasaun. Ko’alia kona-ba out work entaun 3% hosi kustu ró ne’e, ezemplu kustu ró nian millaun $1 ka $2, ita haree hosi ne’e kálkula ba 3% ne’e hira? Maibé atu aplika ida ne’e tenke bazeia ba dokumentu”, nia fó ezemplu.

Lembra katak empreza Niaga Shipping International hosi Indonézia haruka, iha dezembru tinan kotuk, tékniku no tripulante hamutuk 14 hodi hadi’a ró Ocean Star hosi Indonézia ne’ebé para de’it iha tasi-laran iha área Lecidere.  Ró ne’e to’o iha Dili, iha 04 abril 2021, iha tempu inundasaun no covid-19 nia laran.

Notísia relevante: https://tatoli.tl/2023/01/05/niaga-shipping-hadia-ona-ro-ocean-star-neebe-para-kleur/

Jornalista: Antónia Gusmão

Editora: Maria Auxiliadora 

iklan
iklan

Leave a Reply

iklan
error: Content is protected !!