iklan

ATAÚRO, HEADLINE

Dezenvolvimentu infraestrutura nesesariu ba progresu turizmu iha Ataúro

Dezenvolvimentu infraestrutura nesesariu ba progresu turizmu iha Ataúro

Administradór Munisípiu Ataúro, Domingos Soares. Imajen Tatoli/Nelson de Sousa.

ATAÚRO, 08 marsu 2023 (TATOLI) – Administradór Munisípiu Ataúro, Domingos Soares hateten, dezenvolvimentu infraestrutura hanesan Portu no Aeroportu importante ba progresu no dezenvolvimentu setór turizmu iha illa Ataúro.

“Ita-nia objetivu mak atu dezenvolve illa ida ne’e sai destinasaun turístiku. Entaun, ita tenke prepara kondisaun para bele atinji ita-nia alvu,” Administradór Domingos hato’o kestaun ne’e iha Munisípiu Ataúro, kuarta semana ne’e.

Autoridade munisipál ne’e dehan, atu fasilita movimentu transporte aero no marítima ba-mai Ataúro, kondisaun infraestrutura sira tenke adekuadu no seguru.

Enkuantu, Governu aloka ona orsamentu hamutuk millaun 13 USD ba Fundu Espesiál Dezenvilvimentu Ataúro hodi finansia projetu dezenvolvimentu infraestrutura bázika sira hanesan portu, aeroportu, bee no saneamentu, estrada, eletrisidade no seluktan.

“Ita-nia konsentrasaun agora haree liubá dezenvolvimentu portu no aeroportu uluk. Hafoin, mak ita hakat ba bee, estrada no eletrisdade,” Nia hateten.

Líder másimu Munisípiu Ataúro ne’e informa, estudu viabilidade ba portu no aeroportu Ataúro hahú realiza ona. “Konsellu Admimistrasain Fundu Espesiál lidera husi Ministru Planu no Ordanamentu Territoriál, José Reis mak sei lidera prosesu tomak .”

Nia rekoñese, Ataúro iha potensialidade turizmu boot, tantu iha rai-maran no tasi okos, entaun presiza iha dezenvolvimentu infraestruturea adekuada hodi atrai turista vizita Ataúro.

Atualmente Ró Nakroma mak halo operasaun, tula pasajeiru ba no mai Ataúro kada sábdu. Enkuantu iha mós Ró Success ne’ebé iha koopersaun ho parseiru sira hodi halo operasaun kada tersa no sesta. Entretantu, iha mós Ro Dragon ne’ebé mak tula pasajeiru ba-mai Ataúro, semana ida dala rua – kinta no sábadu.

Iha sorin seluk, iha mós iha Voo ba-mai Ataúro, ho aviaun ki’ik ne’ebé mak ajuda husi Mission Aviation Fellowship. Voo ba-mai Ataúro monu iha loron – segunda, kuarta no sesta.

Ataúro nu’udar munsípiu espesiál ne’ebé ho ninia totál populasaun hamutuk 11.744, kompostu husi mane hamutuk 5.715 no feto 5.509.

Notísia relevante:Ataúro: Komunidade 80% mak seidauk asesu ba kanalizasaun bee moos

Jornalista     : Filomeno Martins 

Editór             : Rafael Ximenes de A. Belo

iklan
iklan

Leave a Reply

iklan
error: Content is protected !!