NASIONÁL, EDUKASAUN, HEADLINE, POLÍTIKA

Governu aprova estatutu karreira edukadór husi Ensinu Pré-eskolár to’o Sekundáriu

Governu aprova estatutu karreira edukadór husi Ensinu Pré-eskolár to’o Sekundáriu

Primeiru-Ministru, Taur Matan Ruak, prezide reuniaun Konsellu Ministru, iha Palásiu Governu, kuarta (08/03). Imajen Tatoli/Francisco Sony

DILI, 08 marsu 2023 (TATOLI) – Konsellu Ministru aprova alterasaun ba Estatutu Karreira Edukadór sira ba Infánsia, Ensinu Báziku no Sekundáriu (Estatutu Karreira Dosente nian), ne’ebé aprezenta husi Ministru Edukasaun, Juventude no Desportu (MEDJ), Armindo Maia.

“Alterasaun ida-ne’e hakarak atu atualiza Estatutu Karreira Dosente hodi akomoda evolusaun no dezafiu sistema edukativu daudaun ne’e iha Timor-Leste atu fó kontinuidade ba dezenvolvimentu rekursu umanu nasionál, hodi promove kualifikasaun profesór sira-nian no atu asegura katak hirak ne’e tenke koloka tuir nesesidade reál país nian”, Ministru Prezidénsia Konsellu Ministru, Fidélis Magalhães, hatete iha Palásiu Governu, kuarta ne’e.

Governante ne’e salienta ho alterasaun ba Dekretu-Lei n. 23/2010, loron 9 fulan-dezembru ne’e hakarak atu hametin valorizasaun karreira liuhosi sistema regulár sira atu halo verifikasaun ka aferisaun bá kompeténsia sira no prevee mekanizmu formasaun no avaliasaun dezempeñu nian ne’ebé bele garante kualidade sistema edukasaun no ensinu nian.

Dekretu-lei ida-ne’e determina estabelesimentu sistema rekrutamentu ida ba dosente foun sira liuhosi kriasaun Bolsa Kandidatura sira-nian no kria rejime espesiál ida ingresu nian ba profisionál sira edukasaun nian ne’ebé dedika an ba ensinu no ne’ebé hetan ona abilitasaun mínima ne’ebé lei haruka hodi bele tama ba karreira.

Nune’e, alterasaun sira ba Estatutu Karreira Dosente ninia objetivu mak atu garante kualidade ensinu no profesór sira nian, hodi promove meiu sira atu halo selesaun, verifikasaun no kolokasaun husi rekursu sira, bazeia ba méritu no profisionalizmu, no ho adaptasaun ba nesesidade nasionál sira.

Governante ne’e esplika katak ba indivíduu kontratadu sira ne’ebé mak ezerse hela funsaun dosente durante tinan 2023, maibé laiha abilitasaun akadémika mínima ne’ebé presiza atu sai dosente, sei garante oportunidade atu hili kona-ba sira-nia futuru, hanesan rekoñesimentu ba sira nia dedikasaun ba sistema edukasaun nasionál nian.

“Nune’e, sira bele hili entre kontratu provimentu ba tempu indeterminadu atu ezerse funsaun administrativa ka funsaun apoiu ba dosénsia, ho remunerasaun ekivalente ba Grau D, eskalaun dahuluk, husi rejime jerál administrasaun públika nian, ka indemnizasaun ida hanesan kompensasaun ba dedikasaun tempu servisu nian, ho valór saláriu ida ba tinan tolu idaidak iha ne’ebé nia ezerse funsaun sira, tuir períodu kontratasaun ne’ebé rejista ona iha SIGAP [Sistema Integradu Jestaun Administrasaun Públika]”, konklui.

Jornalista : Antónia Gusmão

Editora: Maria Auxiliadora

iklan
iklan

Leave a Reply

iklan
error: Content is protected !!