DILI, 08 marsu 2023 (TATOLI) – Konsellu Ministru aprova ona rezolusaun Governu nian hodi kria grupu traballu atu halo reavaliasaun ba partisipasaun Estadu nian iha projetu TL Cement.
Grupu traballu ne’e sei kompostu husi reprezentante ministériu oioin no sei iha responsabilidade atu analiza Akordu Espesiál Investimentu nian, kontratu promesa no akordu parasosiál ne’ebé asina ona, nune’e mós define oinsá ezerse direitu sira ne’ebé mai husi kontratu-promesa.
“Projetu ne’e aprezenta husi Ministru Koordenadór Asuntu Ekonómiku, Joaquim Amaral, Ministru Petróleu no Minerál, Victor da Conceição Soares no Vise-Ministru Finansa, António Freitas”, Ministru Prezidénsia Konsellu Ministru, Fidélis Magalhães, hatete iha Palásiu Governu, kuarta ne’e.
Grupu ne’e sei aprezenta, iha prazu másimu loron 40, relatóriu ida ho konkluzaun no proposta hirak ne’ebé maka rezulta husi atividade ne’ebé dezenvolve ona no sei prezide husi reprezentante Ministru Koordenadór Asuntu Ekonómiku.
Rekorde katak Ministru Koordenadór Asuntu Ekonómiku, Joaquim Amaral, hatete Governu kontinua halo investimentu ba projetu TL Cement, maski antes ne’e iha reuniaun Konsellu Ministru deside hodi enserra konta bankária aberta ba projetu ne’e.
Governu taka konta bánkaria aberta iha tinan 2018 hamutuk ho Banku Sentrál Timor-Leste, titulada husi Autoridade Nasionál Petróleu no Minerál, relasiona ho projetu TL Cement, no transferénsia husi montante ne’ebé depozita iha konta ne’e ba iha konta tezouru nian tuir rekomendasaun hosi Kámara Konta atu devolve hikas mai iha tezouru Estadu nian.
Notísia relevante : https://tatoli.tl/2023/02/01/governu-enserra-konta-bankaria-ligadu-ho-projetu-tl-cement/
Jornalista: Antónia Gusmão
Editora: Maria Auxiliadora
