DILI, 08 marsu 2023 (TATOLI) – Vise-Minstru Finansa, António Freitas, informa Governu seidauk bele lansa fatuk dahuluk ba projetu rekonstrusaun Aeroportu Prezidente Nicolau Lobato tanba prosesu konkursu sei iha Komisaun Nasionál Aprovizionamentu (CNA, sigla portuges).
“Prosesu agora iha Komisaun Nasionál Aprovizionamentu tanba hetan tiha ona non objection hosi Banku Aziátiku ba Dezenvolvimentu. Tempu badak sei lori filafali ba Konsellu Ministru hodi halo aprovasaun, hafoin ne’e lori bá Tribunál Konta hodi hetan vistu. Entaun, husi prosesu ida ne’e maka iha marsu seidauk bele halo lansamentu, maibé tarde liu iha semana daruak fulan-abril”, governante dehan ba Agência Tatoli, iha Palásiu Governu, kuarta ne’e.
Nia relembra, tuir ajenda ne’ebé iha, Governu hakarak halo lansamentu ba projetu aeroportu ne’e iha fulan ne’e.
“Molok realiza lansamentu tenke iha kontratasaun katak tenke kontrata kompañia hodi informa ba públiku katak kompañia refere mak sai manán-na’in”, nia realsa.
Projetu dezenvolvimentu aeroportu ne’e opta modalidade ‘hybrid PPP’ ho nia natureza mekanizmu finansiamentu envolve fonte finansiamentu oioin hanesan subvensaun públika, empréstimu no orsamentu kontrapartida husi Governu Timor-Leste
Antes ne’e, iha ámbitu asinatura akordu finansiamentu hosi doadór hanesan BAD, Governu Austrália no Ajénsia Koperasaun Internasionál Japaun (JICA, sigla inglés), Governu deklara katak serimónia lansamentu primeira pedra ba projetu dezenvolvimentu aeroportu planeia ona ba marsu ne’e.
Notísia relevante : https://tatoli.tl/2023/02/08/lansamentu-fatuk-dahuluk-ba-projetu-konstrusaun-aeroportu-comoro-realiza-iha-marsu/
Jornalista: Antónia Gusmão
Editora: Maria Auxiliadora
