iklan

NASIONÁL, EKONOMIA, HEADLINE

Lansamentu fatuk dahuluk ba projetu konstrusaun aeroportu Comoro realiza iha marsu 

Lansamentu fatuk dahuluk ba projetu konstrusaun aeroportu Comoro realiza iha marsu 

Estudante sira husi Java, Indonesia bainhira to'o iha aeroportu Nicolao Lobato, Dili 29 Marsu 2020.Imajen/Antonio Goncalves

DILI, 08 fevereiru 2023 (TATOLI) – Governu planeia ona atu hatuur fatuk dahuluk ba projetu konstrusaun Aeroportu Internasionál Prezidente Nicolau Lobato (AIPNL) Comoro, iha fulan-marsu 2023.

“Projetu Dezenvolvimentu AIPNL opta modalidade ‘hybrid PPP’ ho nia natureza mekanizmu finansiamentu envolve fonte finansiamentu oioin hanesan subvensaun públika, empréstimu no orsamentu kontrapartida husi Governu Timor-Leste”, Ministru Finansa, Rui Augusto Gomes, hatete liuhosi nota ne’ebé Agência Tatoli asesu.

Tanba nia natureza finansiamentu ne’ebé kompleksu tebes, presiza iha liña koordenasaun serbisu ne’ebé di’ak entre doadór sira hodi evita duplikasaun esforsu, rekursus no servisu.

Rekorde katak, iha loron 25 janeiru, Konsellu Ministru delibera no fó podér tomak ba Ministru Finansa, Rui Gomes hodi reprezenta Governu Timor-Leste asina akordu kontribuisaun finanseira ho montante millaun $37,5 husi Ajénsia Kooperasaun Internasionál Japaun (JICA, sigla Inglés).

Nune’e, iha loron 09 fevereiru, Rui Gomes no reprezentante JICA, Ito Mimpei, sei asina akordu subvensaun públika (Grant) ho montante millaun $37,5 hodi finansia konstrusaun terminál pasajeirus foun ho nia sistema abastesimentu bee-moos inklui instalasaun fasilidade apoiu no ekipamentu iha Aeroportu Internasionál Comoro.

“Ho assinatura akordu subvensaun públika husi JICA, signifika katak ita-nian ai-riin haat, mak finansiamentu husi ADB millaun $135, Austrália millaun $73,4, JICA millaun $37,5 no kontrapartida husi ita-nian Governu ba kompontente hotu hamutuk millaun $52, kompleta ona. Nune’e ita bele hahú ona ita-nian prosesu aprovizionamentu konkursu para atu harii Aeroportu Internasionál Prezidente Nicolau Lobato”, Rui Gomes afirma.

Notísia relevante: Aeroportu Internasionál Nicolau Lobato prienxe ona rekizitu ICAO

Governante ne’e hatutan katak husi orsamentu millaun $135 husi ADB ne’e sei uza hodi finansia projetu estensaun pista aterrajen, konstrusaun torre-kontrole tráfiku aéreu no reabilitasaun fasilidade sira seluk iha aeroportu internasionál ne’e.

Enkuantu orsamentu millaun $73,4 husi Austrália sei uza hodi konstrui asesu estrada bá terminál pasajeiru, pakote kombate inséndiu, edifísiu kuarantena animál no planta, edifísiu ba kuidadu saúde primária, depózitu ba kombustível, eletrisidade no iluminasaun públika, fasilidade bee-moos, fatin estasionamentu karreta no motór, inklui zona drop off terminál pasajeiru iha aeroportu ne’e rasik.

Aleinde ne’e, Governu Timor-Leste aloka millaun $52 liuhosi Fundu Infraestrutura hodi finansia akizisaun rai, kompensasaun ai-horis no kustu reasentamentu ba família sira ne’ebé mak hela besik iha área aeroportu inklui obra konstrusaun sivíl sira seluk.

Notísia relevante: MF garante Aeroportu Comoro kontinua funsiona durante prosesu konstrusaun  

Jornalista: Antónia Gusmão

Editora: Maria Auxiliadora

iklan
iklan

Leave a Reply

iklan
error: Content is protected !!