OÉ-CUSSE 08 marsu 2023 (TATOLI) – Diretór Rejionál Infraestrutura iha RAEOA, Cândido dos Reis Amaral, fó-sai katak, projetu estrada nasionál hosi sub-rejiaun Pante Makasar hahú hosi suku Cunha, liga sub-rejiaun Oésilo suku Bobometo iha ona prosesu ba faze konkursu públiku.
Diretór Obra Públika ne’e, fundamenta, daudaun ne’e parte aprovizionamentu fó-sai ona aviza ba públiku kompañia sira mós hatene ona no foti ona dokumentu, iha kompañia internasionál rua mak sei kompete iha projetu ne’e tanba sira mós foti ona dokumentu.
“Prosesu estrada nasionál hosi Pante Makasar ba sub-rejiaun Oésilo, ita halo fila-fali liuhosi servisu aprovizionamentu tanba uluk ita halo fali ba prosesu re-tender (re-konkursu) entaun iha kompañia rua mak tuir, neste momentu kompañia rua mak foti ona dokumentu, ita hein katak, iha fulan ne’e sira bele hatama ona dokumentu ba prosesu tenderizasaun,” Cândido Amaral, informa ba jornalista sira iha Oé-Cusse, kuarta ne’e.
Nia informa, bainhira kompañia submete ona dokumentu ba iha parte aprovizionamentu hanesan kritéria ida, ekipa painél sira sei hala’o ona servisu avaliasaun, nune’e faze tuir hatene ona nia rezultadu manán-na’in atu ezekuta projetu estrada nasionál ne’e.
“Projetu ne’e planu ba tinan 2023 la’ós ba 2024 tanba nia orsamentu autoridade prevee tiha ona, ita só halo de’it re-prosesu ba konkursu públiku tanba antes ne’e iha reklamasaun protesta, ita tenke re-tender fali ne’ebé iha tinan ne’e tenke hatuur fatuk haduluk hodi ezekuta ona,” nia afirma.
Notísia relevante: Autoridade adia hatuur fatuk dahuluk projetu estrada nasionál Pante Makasar-Oésilo
Jornalista: Abílio Elo Nini
Editór: Evaristo Soares Martins
