DILI, 09 marsu 2023 (TATOLI)—Bankada CNRT ho FRETILIN iha Parlamentu Nasionál (PN), iha ona konkordánsia atu hili ka buka figura kandidatu komisáriu Komisaun Antí Korrupsaun (CAC, siglá portugés).
Notísia Relevante: PPN fó tempu bankada Parlamentár buka konsensu ba eleisaun komisáriu CAC
“Iha reuniaun líder bankada ka meza bankada rua CNRT ho FRETILIN semana liubá, iha desizaun atu bankada rua ne’e hasoru malu ko’alia oinsá mak intende kona-ba figura kandidatu ne’e. Entaun, horisehik bankada rua hasoru malu ona maibé ne’e foin primeiru enkontru iha konkordánsia atu hahú fihir figura sira-ne’ebé bele prienxe kriteiru tuir lei,” Xefe Bankada CNRT iha PN, Deputadu Duarte Nunes, hateten ba jornalista sira iha PN, kinta ne’e.
Nia hatutan, tanba iha problema ida-ne’ebé PN hasoru mak labele lori naran ema-nian mai depois sai tiha konsumu públiku ema lakohi fali, ida-ne’e halo ema sente hanesan difikuldade, nune’e atu husu ema-nia naran mai tenke ho kuidadu.
Bankada sira bele iha entendimentu maibé tuir lei sé mak halo proposta ne’e só Governu, serake haruka ba Governu simu ka lae, ida-ne’e mós problema tanba ne’e sei iha faze ne’ebé bankada rua ne’e sei ko’alia ba malu, karik semana oin mai bele hetan naran balun mós tenke konsulta uluk ho Governu, depois ofisialmente ema haruka mai.
Tanba ne’e, to’o iha entendimentu ida katak se semana oin mai tan sei komesa haree naran, depois bankada Fretilin ho sira seluk mak sei lori ba konsulta ho Governu tanba sira mak apoiu Governu.
Nia dehan, foin mak hanoin atu fihir naran tanba CNRT bele hanoin maibé sira (Bankada Governu) mak hanoin uluk, iha enkontru tuir mai karik naran ruma mosu no bele halo diskusaun no karik iha konkordánsia bankada rua ne’e mai konsulta fali bankada sira seluk, tanba hanoin ida-idak lori nia votu.
“Bainhira iha ona entendimentu mak lori naran ba Governu no karik Governu konkorda mak foin propoin mai. Ida-ne’e mak nia prosesu, ami konkorda malu atu la’o tuir. Bankada rua konkorda, sira (Fretilin) mak sei fihir,” nia dehan.
Prezidente Parlamentu Nasionál, Aniceto Longuinhos Guterres Lopes, hateten nia parte foin lalais iha reuniaun lidér bankada parlamentár sira husu ona atu bankada sira buka ko’alia ba malu kona-ba kandidatu eleisaun ba komisáriu CAC ho prazu to’o loron 16 fulan-marsu ne’e.
“Bankada sira hatene hotu ona, hori bainhira ha’u deklara prazu iha konferénsia líder bankada ne’ebé bankada sira hatene, agora foin semana ida laiha buat ida, ha’u tenke hein,” nia hateten.
Jornalista : Nelson de Sousa
Editór : Cancio Ximenes
