BOBONARO, 09 marsu 2023 (TATOLI) – Ekipa Jestaun Programa (EJP) hamutuk 33, kinta ne’e selebra kontratu subvensaun ho Prezidente Autoridade Munisípiu Bobonaro, Ernesto de Oliveira Barreto, hodi ezekuta orsamentu ba programa merenda eskolár tinan 2023 nian.
Prezidente Autoridade Munisípiu Bobonaro, Ernesto de Oliveira Barreto, hateten orsamentu jerál Estadu (OJE) tinan 2023 Bobonaro aloka montante boot liu ba programa ne’e ho objetivu atu responde ba moto VIII govenu konstituisionál katak investe liu ba ema, tanba ema mak sai sentru ba dezenvolvimentu.
Tanba ne’e apela ba EJP hotu atu ezekuta orsamentu tuir matadalan ne’ebé estabelese ona nune’e bele hatudu rezultadu di’ak iha implementasaun.
Notisía relevante: Edukasaun Bobonaro sei implementa merenda eskolár iha semana oin
“Ita ko’alia kona-bá merenda eskolár, ita ko’alia kona-bá osan, osan ne’e sé nian, osan ne’e povu nian, ita ezekuta tuir dalan ne’ebé mak diresaun indika ona, tanba ita aumenta tan osan ba sentativu 0,42 loron ida kada alunu, atu hasa’e nutrisaun ita-nia oan sira,” nia hateten iha salaun enkontru serbisu munisipál edukasaun Bobonaro.
Ernesto de Oliveira husu ba diretór, koordenadór eskola no Gabinete Apoiu Tékniku (GAT) eskola idak-idak atu kontrola no koopera ho EJP sira, tanba konsidera sistema matadalan ba programa iha tinan ne’e hanesan pilotu.
Nia subliña, programa merenda eskolár tinan ne’e sei implementa iha loron 20 fulan-marsu ho totál loron efetivu 147.
“Bainhira implementa ona, ha’u sei orienta doutór sira kada fulan-rua tún ba postu hodi tetu labarik sira, ita-nia oan sira-nia todan aumenta ka lae, governu fakar osan ba sira tanba sira mak futuru ba rai ida-ne’e nian, ita sira-ne’e mate hotu ona sira-ne’e mak kontinua,” nia katak.
Maibé nia dehan, hafoin implementa programa ne’e, Care International sei kontinua fasilita formasaun prátika ba EJP sira durante loron sia kobre postu hotu-hotu.
Diretór Servisu Munisipál Edukasaun Bobonaro, Crispim Moniz Lopes, esplika governu hakarak kontinua implementa programa ne’e ho objetivu atu kombate problema ra’es badak no isin-krekas.
“Ita haree problema rua ne’e mak afeta ba labarik iha Timor ne’e ninia kakutak ne’e dezenvolve ladún di’ak, ne’e mak governu implementa programa ne’e ho moto katak ema mak sai hanesan sentru ba dezenvolvimentu, entaun investimentu maka’as liu ne’e ba iha ema, liuliu ba labarik sira-ne’ebé mak sai hanesan futuru jerasaun país ida-ne’e,” nia dehan.
Nia argumenta, programa ne’e di’ak tebes tanba alende fó nutrisaun di’ak ba labarik sira fó mós benefísiu ba komunidade agrikultór sira iha baze.
“Tuir saida mak estipula iha manuál ne’ebé mak iha 75% ne’e tenke produtu lokál, tanba ne’e ne’e programa merenda eskolár kontribui tebes ba iha kresimentu ekonómiku, depois ezije ita-nia povu atu kuda barak, nune’e eskola ho EJP bele sosa produtu hirak-ne’e,” nia akresenta.
Edukasaun nu’udar entidade implementadór ba programa ne’e, nune’e ba oin sei koordena ho servisu munisipál seguransa alimentár, servisu saúde munisipál, diresaun aprovizionamentu, finansa, inspesaun munisipál no ajénsia fiskalizasaun munisipál sei halo monitorizasaun regulár.
Enkuantu autoridade munisípiu Bobonaro aloka orsamentu ba programa merenda eskolár tinan ne’e hamutuk $1,658,459,88 no hosi montante ne’e fahe ba nível pre-eskolár 40 ho valór $138,482.82 no ensinu báziku 136 ho valór orsamentu $1,519,977.06
Enkuantu totál estudante ne’ebé sei asesu programa refere hamutuk 26,862 komposta hosi nível pre-eskolár 2,243 no ensinu báziku 24,619.
Notísia relevante: Edukasaun Bobonaro hetan millaun $1-resin implementa merenda eskolár
Jornalista : Sergio da Cruz
Editór : Evaristo Soares Martins
