DILI, 09 marsu 2023 (TATOLI) – Embaixadór nipóniku iha Timor-Leste, Tetsuya Kimura, hasoru malu ho Primeiru-Ministru (PM), Taur Matan Ruak, hodi aprezenta empreza CWP Global hosi Japaun, ne’ebé hakarak ajuda Timor-Leste iha sistema fornesimentu bee-moos nian.
“Hasoru Primeiru-Ministru hodi aprezenta kompañia CWP ne’ebé serbisu iha área bee nian. Bee importante tebes ba komunidade tanba ne’e Japaun instala sistema fornsemintu bee ho eskala kiik iha área rurál no empreza CWP mai iha ne’e koopera oinsá mak atu hametin sistema fornesimentu bee nian iha Dili no iha área rurál”, diplomanta ne’e hatete iha Palásiu Governu.
Empreza CWP hanesan parseiru importante Governu nipóniku nian no halo parseria barak iha Timor-Leste ho empreza privada no ho Universidade Nasionál Timor Lorosa’e. Tanba ne’e, Japaun mós fó konfiansa ba sira-nia empreza privadu hodi halo parseria ida ne’e.
“CWP iha Timor-Leste sei halo mós parsewria ho empreza sira Japaun nian. Sira sei hametin kooperasaun ho universidade sira atu halo peskiza konjunta no ho Governu Timor-Leste kona-ba sistema abastesimentu bee-moos. Tanba ne’e ami hasoru Primeiru-Ministru atu esplika kona-ba situasaun ida ne’e”, nia afirma.
Biban hanesan, prezidente empreza CWP, Kon Yusuke, dehan atividade sira ne’ebé CWP sei hala’o maka hadi’a sistema fornesimentu bee iha área rurál liuhosi auto-jestaun ho razaun katak Timór sei falta rekursu umanu no finanseiru, entaun empreza ne’e sei mai introdús atividade liga ho ida ne’e hodi ajuda liután povu.
“Ami-nia kompañia boot ida ne’ebé haree kona-ba bee nian. Mai iha Timor-Leste atu dezenvolve sistema fornesimentu bee ho di’ak liután, nomós fahe esperiénsia ba enjeñeiru sira liuhosi fó treinamentu tékniku nian, hafoin ne’e sira hala’o estájiu iha Timor-Leste nomós iha Japaun”, nia esplika.
Aleinde ne’e, reprezentante husi Kanazawa University, Makoto Fujiu, realsa sira selebra ona akordu ho UNTL, tanba ne’e hasoru malu ho Xefe Governu hodi informa sira-nia objetivu.
“Akordu ne’ebé asina ho UNTL hodi halo peskiza hamutuk iha área bee nian, haree liubá manutensaun ba infraestrutura oinsá atu apoia materiál bee nian no iha tempu badak sei hamutuk ho estudaunet UNTL hodi halo peskiza”, katak.
Notísia relevante: Empreza japoneza planeia rekruta timor-oan serbisu iha área informátika no bee-moos
Jornalista: Antónia Gusmão
Editora: Maria Auxiliadora
