NASIONÁL, EKONOMIA, HEADLINE

Portál Transparénsia seidauk funsiona tanba sei iha faze atualizasaun

Portál Transparénsia seidauk funsiona tanba sei iha faze atualizasaun

Vise-Ministru Finansas, António Freitas. Imajen Tatoli /Egas Cristóvão

DILI, 09 marsu 2023 (TATOLI) – Vise-Ministru Finansa, António Freitas, hatete Portál Transparénsia seidauk funsiona tanba ekipa téknika hosi empreza Free Balance sei halo atualizasaun. 

“Loos duni katak Portál Transparénsia seidauk funsiona, maibé atu dehan ami [Ministériu Finansa] kontinua serbisu ho Free Balance ne’ebé maka tau-matan ba ita-nia sistema ne’e. Iha asuntu tékniku balun tanba ita implementa ita-nia orsamentu ne’e ho klasifikasaun ekonómika ne’ebé mak barak, entaun tenke halo migrasaun ba dadus balun, halo verifikasaun téknika liután”, Vise-Ministru Finansa dehan iha Palásiu Governu.

Governante ne’e konfirma katak prosesu la’o hela tanba fim-semana mós ekipa kontinua halo serbisu. “Fiar katak fulan ne’e ramata funsiona hikas ona, maibé atu garante presiza loron hira atu finaliza ha’u labele dehan tanba ne’e sai hosi ha’u-nia kontrolu no ne’e kestaun téknika liu”, nia realsa.

Tékniku hosi empreza Free Balance atualiza Portál Transparénsia hodi apár ho klasifikasaun orsamentu foun hamutuk 17, tanba antes ne’e iha de’it kategoria lima.

Item lima ne’e mak kapitál menór, kapitál dezenvolvimentu, sasán no servisu, transferénsia públika no saláriu no vensimentu. Ba klasifikasaun orsamentu foun hamutuk 17 ne’e mak, kustu funsionáriu, akizusaun bens korrente, akizisaun serbisu atuál, alugér, interrese, taxa, transferénsia korrente, despeza korrente seluk, akizisaun sasán no kapitál, transferénsia kapitál, finansiamentu ativu no pasivu.

Notísia relevante : https://tatoli.tl/2023/02/28/tekniku-husi-empreza-free-balance-atualiza-hela-portal-transparensia/

Jornalista : Antónia Gusmão

Editora: Maria Auxiliadora

iklan
iklan

Leave a Reply

iklan
error: Content is protected !!