PPN tau ona ajenda konsultasaun Pensaun Vitalísia maibé bankada parlamentár nonook
DILI, 09 marsu 2023 (TATOLI)—Prezidente Parlamentu Nasionál, Aniceto Longuinhos Guterres Lopes, tau ona ajenda reuniaun ho líder bankada Parlamentár hodi halo konsultasaun ba proposta-lei númeru 14/V(2a)-Rejíme Jurídiku Seguransa Sosiál Titulár Órgaun Soberania (alterasaun lei pensaun vitalísia) maibé bankada parlamentár nonook no sira laiha ida mak pronúnsia sai.
Notísia Relevante: Reajenda diskusaun alterasaun lei Pensaun Vitalísia hein reuniaun líder bankada
“Iha tau ajenda atu rona bankada parlamentár maibé sira ida nein pronúnsia. Agora ha’u labele obriga sira atu pronúnsia,” Prezidente Parlamentu Nasionál, Aniceto Longuinhos Guterres Lopes, hateten ba jornalista sira hafoin prezide reuniaun líder bankada iha sala konferénsia PN, kinta ne’e.
Antes ne’e, iha loron 30 fulan-janeiru tinan ne’e, PN liuhosi reuniaun plenária hahú debate ba proposta lei Rejíme Jurídiku Seguransa Sosiál Titulár Órgaun Soberania ne’e iha faze jeneralidade, maibé iha apresiasaun polítika Deputadu balun espresa atu vota kontra maibé maiória hakarak fó hikas ba Governu atu hadi’a, nune’e meza plenária deside fó hikas fali ba Governu atu halo armoniza didi’ak tuir sujestaun deputadu sira-nian.
Hanesan Deputadu sira deklara iha plenária liu ba foti problema mak iha proposta-lei ne’e tau hanesan tiha órgaun soberania sira ho funsionáriu públiku, aleinde Prezidente Repúblika nia grau rekoñesimentu iha prosesu rejime ne’e atu lori ba iha seguransa sosiál ne’e prosesu la’o hanesan ho funsionáriu públiku baibain.
Ida fali mak lei foun ne’e aprova mak sei hamate lei tuan pensaun vitalísia, entaun Deputadu sira agora simu tiha ona pensaun vitalísia ne’e óinsa, lei ne’e mate sira lakon ona ka sira tama regra foun, no iha resposta Vise Ministra Solidariedade Sosiál no Inkluzaun (MSSI) katak lei ne’e la’o ba oin, ida-ne’e problema ona tanba lei mate tiha ona maibé sira hetan nafatin ne’e bazea ba saida.
Problema seluk mak Deputadu sira kestiona kona-ba regra implementasaun tuir lei foun ne’e ba ema sira Deputadu ho Ministru sira foun de’it ka sira tuan mós depois nia klasifikasaun oinsá ne’ebé halakon tiha direitu ho lei foun ne’e atu rezolve oinsá, aleinde ho kestaun sira seluk.
Nune’e, nia dehan, haruka fila proposta-lei ba Governu hodi reformula tuir sujestaun ne’ebé iha, maibé hafoin ne’e parte Governu argumenta ona katak atu hadi’a mak PN presiza hato’o rekomendasaun espesífiku bele hosi komisaun A.
Prezidente PN, Aniceto Guterres, hateten nia-parte hafoin konsulta ho baze legál sira laiha previzaun ida ne’ebé klara, espresamente fó dalan atu inisiativa ka proposta-lei ne’e bele fó fila ba Governu, entaun atu reajenda diskusaun iha plenária sei hein reuniaun líder bankada sira hodi halo konsultasaun.
“Tenke rona bankada sira no agora bankada sira seidauk pronúnsia prontu hein to’o sira pronúsia. Ita-boot sira (jornalista) ba ko’alia ho bankada ida-idak, la’ós ha’u mak atu hola konkluzaun maibé iha ka lae laiha vontade,” nia hateten.
Xefe Bankada CNRT, Deputadu Duarte Nunes, hateten preokupasaun mosu tiha ona diskusaun iha faze jeneralidade no proposta-lei ne’e mai kle’ur.
“Ha’u hanoin se bankada maiória mak konkorda oras ne’e liu tiha ona, tanba sira mak maiória la’ós ami. Ami-nia pozisaun, se ita aprova di’ak liután tanba proposta lei seguransa sosiál mai intensaun atu substitui ona pensaun vitalísia tanba dada prosesu ne’e sira maiória mak ladauk konkordánsia internál hodi avansa ho proposta-lei ne’e, no ami hakarak hela soké ami minória labele halo buat ida,” nai dehan.
Enkuantu, Jornalista Ajénsia Tatoli tenta atu husu mós Xefe bankada Fretilin nia hanoin ba kestuan ne’e maibé xefe bankada Fretilin laiha fatin.
Notísia Relevante: Aniceto Guterres: “Ha’u sei la budu alterasaun Lei Pensaun Vitalísia”
Jornalista : Nelson de Sousa
Editór : Cancio Ximenes
