DILI, 23 fevereiru 2023 (TATOLI)—Prezidente Parlamentu Nasionál, Aniceto Longuinhos Guterres Lopes, hateten atu reajenda diskusaun iha plenária faze jeneralidade ba proposta-lei númeru 14/V(2a)-Rejime Jurídiku Seguransa Sosiál Titulár Órgaun Soberania (alterasaun lei Pensaun Vitalísia), sei hein reuniaun lidér bankada Parlamentár sira.
Notísia Relevante: Deputadu maiória lakohi altera lei pensaun vitalísia
“Agora ha’u tenke konsulta, tanba hori bainhira plenária deklara atu fó hikas ba Governu. Maibé ha’u konsulta baze legál sira laiha provizaun ida-ne’ebé klara, esperesamente bele fó dalan atu inisiativa ka proposta-lei ne’e bele fó fila ba Governu. Atu reajenda diskusaun iha plenária ne’e, sei hein reuniaun lidér bankada Parlamentár sira,” Prezidente Parlamentu Nasionál, Aniceto Longunhos Guterres Lopes, hateten ba Agência Tatoli iha PN, kinta ne’e.
Atu reajenda. nia-parte tenke konsulta ho líder bankada Parlamentár sira, mezmu nune’e meza konvoka dala tolu ona maibé korum la prienxe, nune’e tempu tuir mai kontinua ajenda hodi halo konsulta ho lidér bankada sira molok reajenda iha plenária.
Lidér Segundu Órgaun Soberania ne’e hateten, atu aprova ka lae ba proposta-lei ne’e depende tempu, tanba agora Prezidente Repúblika dekreta ona loron eleisaun parlamentár lais loos.
“Depende tempu, tanba prosesu halo lei ne’e la’ós ho lala’is de’it,” nia dehan.
Notísia Relevante: Governu seidauk simu proposta alterasaun Lei Pensaun Vitalísia hosi PN
Jornalista : Nelson de Sousa
Editór : Cancio Ximenes
