DILI, 07 fevereiru 2023 (TATOLI) – Ministru Prezidénsia Konsellu Ministru, Fidélis Magalhães, hatete Governu seidauk simu proposta alterasaun ba Lei Pensaun Vitalísia hosi Parlamentu Nasionál (PN).
“Ha’u seidauk simu buat ida, maibé ideia ida dehan Parlamentu haruka fali mai Governu ne’e la eziste. Karik Parlamentu dehan aprova, bele aprova depois Governu deside fali Governu nian. La’ós dehan fali devolve mai Governu”, Fidélis afirma ba Agência Tatoli, iha Timor Plaza.
Ministru hatutan katak “sé la aprova ita hotu hatene dehan la aprova. Tanba saida mak la aprova, maioria deputadu sira hanoin oinsá? Esklarese tiha lai ida ne’e ba públiku depois parte Ezekutivu nian tetu. Haree katak Governu nia kontestu agora lahetan apoiu atubele aprova proposta lei ne’ebé haruka ba no tenke halo reavaliasaun ida nivel Konsellu Ministru hodi haree fali estratéjia lejizlativa sira”, dehan.
Kestiona katak se PN haruka duni lei ne’e ba fali Governu, porta-voz Ezekutivu ne’e dehan tenke haree tanba Timor-Leste nu’udar Estadu Direitu Demokrátiku no iha órgaun soberanu sira, kada ida-idak ezerse ninia funsaun.
“Haree tuir buat ne’ebé konstituisaun hatuur, karik haruka fali mai Governu mós ita haree lai buat ne’e ninia intensaun oinsá atu halo fali foun ka oinsá? Maibé haruka halo mudansa ho buat ne’ebé Governu lakonkorda, labele haruka fali tanba labele halo mudansa tuir ida-idak nia hakarak”, nia esplika.
Lembra katak Parlamentu Nasionál fó hikas proposta lei n.u 14/V(2a)-Rejime Jurídiku Seguransa Sosiál Titulár Órgaun Soberania ba Governu hodi bele armoniza ka hadi’a didi’ak tuir sujestaun deputadu sira-nian.
Antes ne’e, iha debate jeneralidade ba proposta lei refere, meza PN liuhosi Prezidente Parlamentu deside fó filafali lei ne’e ba Ministériu Solidariedade Sosiál no Inkluzaun atu armoniza didi’ak tuir sujestaun hosi deputadu sira, maibé parte Governu argumenta ona katak atu hadi’a mak PN presiza hato’o rekomendasaun espesífiku hosi komisaun A.
Prezidente PN, Aniceto Guterres, iha diskusaun jeneralidade ba lei refere, iha semana kotuk, hatete deklarasaun balun husi deputadu sira espresa vontade atu vota kontra no maiória hakarak fó hikas ba Governu atu hadi’a.
Tuir Aniceto, inisitiva ida ne’e di’ak, maibé presiza konsensu Governu ho PN tanba ne’e meza hanoin sujestaun ka proposta atu fó lai ba Governu hodi armoniza.
“Fó lai dezde ita iha kompromisu ida, ita tenke trata antes lejislatura ne’e termina mós, la’ós fó fila ba depois laiha ona. Ne’ebé husu Governu bele hadi’a iha tempu badak depois envia filafali mai iha Parlamentu atu kontinua vota iha jeneralidade no ba kedas espesialidade”, nia sujere.
Notísia relevante : https://tatoli.tl/2023/01/30/deputadu-maioria-lakohi-altera-lei-pensaun-vitalisia/
Jornalista: Antónia Gusmão
Editora: Maria Auxiliadora
