BAUCAU, 10 marsu 2023 (TATOLI)- Autoridade Administrasaun Munisipal Baucau, daudaun ne’e kontinua iha faze preparasaun kondisaun, molok konstrusaun merkadu munispal hala’o.
Sekretária Autoridade Munisipál Baucau, Simão dos Santos Marques Pinheiro, hateten autoridade Baucau halo preparasaun hanesan levantamentu dadus ba vendedor sira, identifika tipu negosio, preparasaun kondisaun infraestrutura inklui harii Asosiasaun Vendedor Merkadu.
“Ita halo ona preparasaun hanesan identifikasaun ba vendedor no kria koordenasaun ho diresaun Transporte Terrestre Baucau hodi fasilita movimentu transporte ba merkadu iha futuru”, Sekretáriu Munisipál Baucau hateten iha Vila nova, sesta ne’e.
Alende ne’e, koordenasaun ho institusaun relevante hanesan Serbisu Munisipál Transporte Terrestre, EDTL, E.P, Obra Publiku, BTL, E.P, Seguransa Sivil, nune’e futuru merkadu refere bele seguru ba vendedor no kompradór sira.
Merkadu Tuanau rasik antes ne’e konstrui fazeadamente liuhosi orsamentu Planu Dezenvolvementu Intergradu Munisipál (PDIM) hosi tinan-2018 hanesan konstrui uma, ateru no to’o 2021 konstrui tan moru protesaun haleu ba merkadu refere.
Merkadu refere tótal área hamutuk ektare ualu no sei iha espasu atu prepara ba konstrusaun projetu hosi Ministériu Turizmu, Komersiu no Industria (MTKI) iha tinan-2023 ne’e.
“Benefisiu di’ak ba komunidade tanba vendedor sira sei konsentra hamutuk hotu no futuru bele konsidera nu’udar ikon ekonomia iha munisípiu Baucau,” Simão Pinheiro akresenta.
Autoridade Baucau iha ona informasaun hosi MTKI atu hahú obra refere iha tinan-2023 no iha esperansa projetu refere bele finaliza lalais, nune’e bele kontribui rendimentu hosi munisípiu no hasa’e ekonomia komunidade.
Antes ne’e, MTKI liuhosi Diresaun Jerál Komérsiu no Diresaun Nasionál Komersiu Internu aprezenta proposta ba dezenvolvimentu Merkadu Munisipál Lautem, Baucau ho Ermera hafoin identifikasaun merkadu hirak refere falta apoia infraestrutura ne’ebé adekuada.
Tuir dadus tótal vendedor ne’ebé rejistradu hamutuk 898 ho tipu negosiu 29 ne’ebé maihosi merkadu tradisional tolu Villa nova, Villa antiga no Bassecamp.
Jornalista : Natalino Belo
Editór : Florencio Miranda Ximenes
