BOBONARO, 10 marsu 2023 (TATOLI) – Empreza Lelo Construction Unipessoal Lda, halo ona manutensaun ba edifísiu Autoridade Aduaneira (AA/Alfándega) Postu Integradu Batugadé, munisípiu Bobonaro.
Manutensaun ne’e halo tanba edísiu AA iha fatin refere ninia zinku ku’ak halo udan-been tama no estraga plafon balun no bele afeta ba mákina raiu-xís ne’ebé durante ne’e utiliza halo kontrolu ba sasán no ema tama-sai.
Vise-Ministru Finansa, António Freitas, hala’o vizita, iha kinta lokraik, bá Postu Integradu Batugadé hodi haree hikas kondisaun edifísiu ne’e no observa katak empreza halo ona manutensaun.
“Momentu ne’ebá bainhira haree tiha plafon ne’ebé aat, orienta ba empreza no sira mobiliza kedas ekipa hodi halo manutensaun”, António Freitas, relata ba Agência Tatoli, sesta ne’e.
Sorin seluk, Komisáriu Autoridade Aduaneira, José António Fátima Abílio, realsa karak edifísiu AA Batugadé iha ona progresu tanba hetan ona manutensaun urjente.
“Ha’u haree ona katak plafon ne’ebé ku’ak iha ona progresu tanba empreza halo ona manutensaun”, nia afirma.
Governu kontrata Lelo Construction Unipessoal Lda. ho osan montante rihun $200 ba halo manutensaun rotina durante tinan rua.
Notísia relevante: Edifísiu Autoridade Aduaneira iha Batugadé presiza manutensaun urjente
Jornalista: Antónia Gusmão
Editora: Maria Auxiliadora
