ELEISAUN, HEADLINE, MUNISÍPIU, OÉ-CUSSE (RAEOA), POLÍTIKA

STAE Oé-Cusse sei rektruta ofisiál eleitorál 1.150

STAE Oé-Cusse sei rektruta ofisiál eleitorál 1.150

Diretora STAE RAEOA, Luíza da Costa. Imajen Tatoli/Abílio Elo Nini.

OÉ-CUSSE 10 marsu 2023 (TATOLI) – Sekretariadu Tékniku Administrasaun Eleitorál (STAE), Rejiaun Administrativa Espesiál Oé-Cusse Ambeno (RAEOA), planeia rekruta poling-staf hamutuk na’in-1.150 hodi servisu iha loron eleisaun parlamentár 2023 ne’e.

Diretóra STAE Oé-Cusse, Luíza da Costa, informa, antes ne’e STAE Oé-Cusse simu orientasaun hosi nasionál loke vaga faze dahuluk ba brigadista 80 no pontu fokál na’in-haat atu destaka iha sentru votasaun sira.

“Agosra brigadista sira na’in-80 ne’e hahú tama ona servisu iha loron 01 marsu, no pontu fokál na’in-haat atu koloka sira iha sub-rejiaun Oésilo, Pante Makasar, Pássabe no Nítibe, entaun faze tuir mai ita sei loke vaga ba poling-staf sei persiza ema na’in-1.150,” Luíza da Costa, informa, ba Agência Tatoli iha Oé-Cusse, sesta ne’e.

Nia esplika, prosesu atu loke vaga ba polin-staf sira-ne’e, sei hahú iha segunda semana oin loron 13 marsu ne’e, nune’e iha abríl sira bele hahú hala’o ona servisu atu prepara ba eleisaun parlamentár, entaun antes ne’e sira sei hetan formasaun no kapasitasaun.

“Ita seidauk koloka sira ba iha baze, tanba sei sira sei hetan formasaun ruma, nune’e bele iha koñesimentu, bainhira atende iha sentru vokasaun,” nia afirma.

Daudaun ne’e STAE rejiaun Oé-Cusse rejista ona sentru votasaun 80 no estasaun votasaun 115 maka estabelese iha territóriu Oé-Cusse, ho totál eleitór provizória bazea dadus 2022 hamutuk 53.153, komposta hosi mane 27.407 no feto 26.106, tanba dadus 2023 sei sinkroniza.

Purtantu, Prezidente Repúblika José Manuel Ramos Horta, dekreta ona loron eleisaun parlamentár ne’e sei akontese iha 21 maiu tinan ne’e.

Atu konkore iha eleisaun parlamentár 2023, daudaun ne’e CNE anúnsia ona partidu polítiku hamutuk 24 mak sei konkore iha eleisaun parlamentár, nune’e mós STAE deklara ona katak períodu kampaña eleitorál ba eleisaun parlamentár ne’e hahú iha 19 abríl 2023.

Jornalista: Abílio Elo Nini
Editór: Evaristo Soares Martins

iklan
iklan

Leave a Reply

iklan
error: Content is protected !!