DILI, 13 marsu 2023 (TATOLI)– Ezekusaun Orsamentu Jerál Estadu (OJE) 2023, esklui kompromisu no obrigasaun sira, to’o 10 marsu 2023 atinji ona millaun $112,3 husi totál orsamentu alokadu biliaun $2,16.
“Ezekusaun Governu Sentrál aas liu mak iha liña ministeriál ne’ebé ezekuta ona millaun $87,9 hosi orsamentu alokadu biliaun $1,2”, haktuir nota ne’ebé Agência Tatoli asesu, segunda ne’e.
Tuir kedan Ajénsia Autónoma ho nia ezekusaun atinji ona millaun $16,5 husi orsamentu alokadu millaun $218,3. Autoridade munisipál ezekuta ona millaun $5,7 husi totál orsamentu millaun $81,3, Fundu Dezenvolvimentu Kapitál Umanu (FDCH, sigla portugés) ezekuta ona millaun $1,1 husi millaun $17,8 no Fundu Infraestrutura (FI) ezekuta ona millaun $1 husi millaun $202,7. Ba Rejiaun Administrativa Espesiál Oé-cusse (RAEOA) ezekuta ona millaun $1,9 husi orsamentu alokadu millaun $84.
To’o iha inísiu fevereiru 2023, Ministériu Finansa foti ona osan husi Fundu Minarai ho montante millaun $300 husi totál orsamentu biliaun $1,3 ne’ebé mak Parlamentu Nasionál aprova ona liuhusi Lei OJE 2023.
Husi 2018 to’o 2022, Governu Daualuk foti ona osan husi Fundu Petrolíferu hamutuk biliaun $5,4 husi totál biliaun $7,1 ne’ebé mak aprovadu husi Parlamentu.
“Ida-ne’e hatudu iha poupansa ka diferensa biliaun $1,7 entre levantamentu aprovadu husi Parlamentu Nasionál no levantamentu atuál”, konklui.
Notísia relevante: Atualiza : Ezekusaun Reál OJE 2023 atinji millaun $87,6
Jornalista: Antónia Gusmão
Editora: Maria Auxiliadora
