NASIONÁL, HEADLINE, POLÍTIKA

Ministru Finansa informa rezultadu konferénsia LDC ba Primeiru-Ministru

Ministru Finansa informa rezultadu konferénsia LDC ba Primeiru-Ministru

Ministru Finansa, Rui Augusto Gomes, iha konferénsia País Menus Dezenvolvidu. Imajen/MF.

DILI, 13 marsu 2023 (TATOLI) – Ministru Finansa, Rui Augusto Gomes, hasoru malu ho Primeiru-Ministru (PM), Taur Matan Ruak hodi informa rezultadu konferénsia País Menus Dezenvolvidu (LDC, sigla inglés) hafoin akompaña Prezidente Repúblika (PR), José Ramos Horta, partisipa eventu internasionál ne’e iha Doha, hosi loron 05 to’o loron 09 marsu.

“Relata ba Primeiru-Ministru kona-ba simeira nivel aas iha Doha ne’ebé Timor-Leste mós partisipa. Temi katak ita sei presiza tempu uitoan atubele dezenvolve ita-nia nasaun, diversifika ekonomia, fonte finansiamentu, buat sira ne’e hotu molok ita hakat bá adezaun ka ita sai hosi status LDC”, Rui Gomes hatete iha Palásiu Governu.

Nia hatutan, tranzisaun hosi estatutu no sai hosi LDC, ida ne’e labele kria interrupsaun, hamosu problema foun ba nasaun sira ne’ebé atu tranzita sai hosi LDC.

“Tanba ita hatene katak kuandu ita tranzita sai hosi LDC maka ita sei lakon previléjiu lubuk ida. Ida ne’e bele mós afeta Timor-Leste nia prosesu dezenvolvimentu. Iha tinan 2024, ekipa LDC sei mai halo avaliasaun, depois ba oin ne’e halo oinssá?”, nia tenik.

Simeira internasionál durante loron lima iha Doha konsege halibur hamutuk Xefe Estadu, ofisiál nivel aas sira, setór privadu, sosiedade sivíl, reprezentante Parlamentu no foinsa’e sira hodi diskute ideia foun hodi implementa kompromisu ‘Doha Programme of Action’ ne’ebé mai ho tema jerál ‘Husi Potensiál ba Prosperidade’.

Rui Gomes lidera delegasaun Ministériu Finansa hodi partisipa iha diskusaun meza redonda lubun ida inklui halo intervensaun iha sesaun ‘Investe iha Kapitál Umanu’.

Notísia relevante: PR Horta aprezenta ekonomia Timor-Leste iha LDS

Jornalista: Antónia Gusmão

Editora: Maria Auxiliadora

iklan
iklan

Leave a Reply

iklan
error: Content is protected !!