VIQUEQUE, 13 marsu 2023 (TATOLI)— Polísia Nasionál Timor Leste (PNTL) munisípiu Viqueque, segunda ne’e, aprezenta ona suspeitu na’in-40 ne’ebé envolve kazu asaltu ka sunu uma iha suku Bahalara-Uain, postu adiministrativu Viqueque ba Ministériu Públiku (MP).
Notísia relevante: Konfrontu iha suku Bahalara-Uain, uma hitu hetan sunu no PNTL detein joven 40
Komadante PNTL munisípiu Viqueque, Superimtendente, Sebestião Alves Quintão, hateten konfrontu ne’e entre komunidade ho komunidade iha suku Bahalara-Uain foin lalais ne’e PNTL aprezenta ona suspetu sira ba MP hodi halo prosesu kontinuasaun ba tribunál.
“Ami halo ona identifikasaun ba suspeitu sira durante iha sela detensaun oras 12. Nune’e kazu ne’e ohin ami aprezenta ona ba Ministériu Públiku atu kontinua prosesa kazu ne’e”, hateten Komadante PNTL munisípiu Viqueque, Superintendente, Sebestião Alves Quintão, ba jornalista sira, iha ninia kna’ar fatin, komandu PNTL Beskem, segunda ne’e.
Tuir nian, iha prosesu identifikasaun ne’e deteta katak suspeitu sira ne’e envolve kazu asaltu, nune’e PNTL foti ona deklarasaun husi vitíma sira no suspeitu sira hodi halo auto notísia aprezenta ba MP.
“Ita hotu hatene katak Ministériu Públiku maka sai nain ba prosesu penál hotu, nune’e ami aprezenta hodi rejista, hafoin ita sei hein notifikasaun husi Ministériu Públiku”, katak.
Daudaun ne’e, nia dehan situasaun atuál iha suku Bahalara-Uain la’o normál tanba PNTL nafatin koordena buka dalan hodi komunidade sira kria unidade, maske kazu ne’e aprezenta ona ba MP.
“Ha’u mós sei koordena ho sub-KRAM munisípiu Viqueque atu bolu fila parte rua suspeitu no vítima sira hodi ko’alia hamutuk, maske ita mosu problema, maibé la signifika katak haketak malu atu ita nafatin kria unidade iha suku no aldeia”, nia hato’o.
Notísia relevante: Protesaun Sivíl Viqueque apoia pakote emerjénsia ba vítima konfrontu iha Bahalara-Uain
Jornalista: Vitorino Lopes da Costa
Editór : Florencio Miranda Ximenes
