DILI, 13 marsu 2023 (TATOLI) – Ministru Finansa, Rui Augusto Gomes, informa katak Portál Transparénsia funsiona hikas hafoin tékniku sira hosi empreza Free Balance halo atualizasaun.
“Atualiza ba Primeiru-Ministru kona-ba Portál Transparénsia ne’ebá funsiona filafali. Ne’ebé buat hotu la’o normál ona”, Rui Gomes iha Palásiu Governu, segunda ne’e.
Hafoin ekipa tékniku husi kompaña Free Balance finaliza traballu tékniku, Gabinete Sistema Integradu Informasaun Jestaun Finanseira serbisu hamutuk ho Diresaun-Jerál Planeamentu no Orsamentu, Ministériu Finansa, hahú importa dadus no halo atualizasaun ba ezekusaun Orsamentu Jerál Estadu (OJE) 2023 ba portál refere.
Prosesu importa dadus ne’e rasik konklui ona no OJE 2023 reflete ona iha Portál Transparénsia osamentál. Hahú ohin bá oin, públiku mós bele akompaña loroloron, progresu ezekusaun OJE 2023 liuhosi pajina http://www.budgettransparency.gov.tl/public/index?&lang=pt.
Governante ne’e realsa hanesan prátika ona iha tinan anteriór, Ministériu Finansa komprometidu atu kontinua relata ba públiku ezekusaun OJE 2023 kada trimestrál.
Notísia relevante : https://tatoli.tl/2023/03/09/portal-transparensia-seidauk-funsiona-tanba-sei-iha-faze-atualizasaun/
Tékniku hosi empreza Free Balance atualiza Portál Transparénsia hodi apár ho klasifikasaun orsamentu foun hamutuk 17, tanba antes ne’e iha de’it kategoria lima.
Item lima ne’e mak kapitál menór, kapitál dezenvolvimentu, sasán no servisu, transferénsia públika no saláriu no vensimentu. Ba klasifikasaun orsamentu foun hamutuk 17 ne’e mak, kustu funsionáriu, akizasaun bens korrente, akizasaun serbisu atuál, alugér, interrese, taxa, transferénsia korrente, despeza korrente seluk, akizisaun sasán no kapitál, transferénsia kapitál, finansiamentu ativu no finanseiru pasivu.
Jornalista: Antónia Gusmão
Editora: Maria Auxiliadora
