PR husu MP hametin independénsia antes adere ba ASEAN
DILI, 13 marsu 2023 (TATOLI)—Prezidente Repúblika (PR), José Ramos Horta, segunda ne’e, simu audénsia Prokuradór Jerál Repúblika (PJR), Alfonso Lopes hodi diskute kona-ba Timor-Leste adere ba ASEAN no PR husu Ministériu Públiku (MP) atu hametin independénsia sistema justisa.
Notísia Relevante: Alemaña apoiu Timor-Leste adere ba ASEAN
“Ita atu tama iha ASEAN, entaun ita-nia sistema justisa tenke hametin liu-liu independénsia, Ministéiru Públiku (MP) autonómia nunka monu ba intervensaun polítika, ne’e mak mensajen Xefe Estadu nian,” Prokuradór Jerál Repúblika (PJR), Alfonso Lopes, hateten ba jornalista sira hafoin ramata enkontru ho PR iha Palásiu Prezidensiál Nicolau Lobato, Bairru
Pite.
Nia hatutan, Ministériu Públiku (MP) firmeza nafatin iha Sistema justisa ne’ebé independente hodi bele lori Timor-Leste adere ba ASEAN.
Durante sorumutu, PJR mós atualiza movimentu prosesuál kazu ne’ebé MP liuhosi prokuradór sira esforsu hodi halo investigasaun.
“Movimentu prosesuál iha fevereiru ne’e hahú inísiu, kazu mai hosi fulan-janeiru 1.895, kazu tama 494, Prokuradór sira esforsu halo investigasaun to’o termina. Totál ikus iha nível nasionál 454, tranzitadu fulan oin 1.930, iha aumentu númeru prosesu pendénsia 35,” nia dehan.
Nia mós hateten, PJR hetan apoiu fundu hosi Uniaun Europeia (UE) liuhusi PFMO, Institutu Camões organiza majistradu na’in-neen dezloka ba Portugál hodi tuir formasaun.
Jornalista : Nelson de Sousa
Editór : Cancio Ximenes
