DILI, 13 marsu 2023 (TATOLI)–Senadu Jerál Universidade Nacional Timor Lorosa’e (UNTL), Cristovo Araújo Mau-to hateten, aban tersa (14/o3), senadu sira iha UNTL sei lori estudante sira hasoru Parlamentu Nasionál hodi informa kona-ba tratamentu diskriminatívu ne’ebé estrutura UNTL halo hasoru estudante foun tinan akadémiku 2023.
Notísia Relevante: Reitór UNTL la konkorda senadu sira boikota orientasaun ba estudante foun
Nia hateten, desizaun senadu sira-nian klaru ona tanba estrutura UTLla konkorda ona atu trava atividade orientasaun ba estudante foun sira, tanba ne’e senadu sira deside sei lori estudante sira ba hasoru Paramentu Nasionál.
“Aban, loron 14 marsu 2023, ami senadu sira sei lori ita-nia alin estudante foun sira ba hasoru Komisaun G ne’ebé trata asuntu edukasaun. Atu informa ba Komisaun G iha Parlamentu Nasionál kona ba tratamentu universidade nian hasoru estudante foun sira-ne’ebé nakonu ho diskriminasaun,” nia hateten ba jornalista sira bainhira Reitór Universidade Nacional Timor Lorosa’e, João Soares Martins, la konkorda sira-nia ezijénsia atu adia atividade orientasaun ba estudante foun sira, iha kampus sentrál UNTL, segunda ne’e.
Desizaun reitór nian hodi la konkorda atu adia orientasaun ne’e konsidera hanesan asuntu ida-ne’ebé sériu duni, tanba ne’e estrutura senadu kada fakuldade sei responde asuntu ne’e mós ho sériu duni, tanba ne’e sira boikota abertura orientasaun ba estudante foun sira hodi husu estudante sira ida-idak fila-fali ba uma iha oras 12h00, atu nune’e bele prepara ba loron aban hodi mai fali atu ba hasoru PN.
Senadu Jerál ne’e husu ba estudante sira atu informa hela ba inan-aman sira katak atividade orientasaun ba loron ohin nian la konsege realiza tanba estrutura UNTL la kria kondisaun ida di’ak, tanba ne’e sira seidauk prepara atu realiza orientasaun ne’e maibe asuntu ne’e sei lori ba PN atu bele hetan ninia solusaun.
Tuir senadu sira, estrutura Universidade hakarak aselera lalais atividade orientasaun ne’e tanba sira iha planu ne’ebé markadu ona tanba iha 18 marsu agora sira sei halo viajen ba estranjeiru, tanba ne’e sira hakarak aselera lalais atividade ne’e.
Senadu ne’e konfesa, kondisaun ba orientasaun ne’e atu iha ka laiha sira la preokupa reitór ninia deklarasaun ne’e kondena fali senadu sira mak hakarak sakrifika estudante sira-ne’e la loos.
“Ha’u hakarak dehan reitór ho ninia estrutura sira mak sakrifika ona estudante sira hodi husik estudante sira habai iha loron-manas nia laran durante hala’o inskrisaun la’ós ami senadu sira,” nia dehan.
Ne’eduni, senadu jerál sei hamutuk ho senadu kada fakuldade sia inklui estrutura tomak sei hamutuk ho estudante sira sei hakat ba PN hodi hato’o preokupasaun sira atu nune’e Parlamentu Nasional bele bolu reitór ho ninia estrutura sira hodi ko’alia asuntu ne’e.
Nia dehan, aleinde hasoru malu ho Komisaun GPN sira mós sei hakat ba edifísiu Ministériu Ensinu Superior Siénsia no Kultura atu hasoru Ministru no Prezidente Komisaun Asesu Engeresu Ensinu Superiór (KAEES) atu toma konsiderasaun ba asuntu ne’e hodi nune’e bele buka solusaun ba asuntu refere.
Notísia Relevante: UNTL la realiza orientasaun, estudante foun 1.000-resin kontinua rejista
Jornalista : Tomé Amado
Editór : Cancio Ximenes
