STAE Bobonaro hahú rekruta ofisiál eleitorál 1.700
BOBONARO, 13 marsu 2023 (TATOLI) – Sekretariadu Tékniku Administrasaun Eleitorál (STAE), Munisípiu Bobonaro, segunda ne’e hahú simu dokumentu hosi kandidatu ofisiál eleitorál ne’ebé konkore iha vaga hamutuk 1.700 hodi prepara ba eleisaun parlamentár.
Diretór STAE Munisípiu Bobonaro, Mariano Viegas Amarál, hatete vaga ne’e sei taka iha loron 24 fulan-marsu.
Notísia relevante: STAE Bobonaro identifika estrada ba sentru votasaun 36 presiza hadi’a
“Kada estasaun votu ita presiza ema na’in-10, tanba Bobonaro iha estasaun votasaun 170, entaun ita presiza ofisiál eleitorál ne’e 1.700,” nia informa ba jornalista sira iha edifísiu Alfándega, Holsa, Maliana.
Hafoin pasa iha vaga refere ofisiál eleitorál sira sei tuir formasaun kona-bá baze legál sira, kna’ar no kompeténsia saida durante eleisaun lejizlativa ne’e la’o.
“Buat-ne’ebé bele halo no labele halo ita tenke informa hotu ba sira, tanba atividade hotu-hotu la’o, bazea ba regulamentu, prosedimentu no lei ne’ebé iha,” nia katak.
Enkuantu daudaun ne’e brigadista na’in-150 ne’ebé STAE rekruta foun lalais ne’e aprezenta-aan ona ba suku 50 hodi halo sira-nia atividade iha baze.
Daudaun ne’e STAE Bobonaro rejista ona sentru votasaun 150 no estasaun votasaun 170 maka estabelese iha suku 50, ho totál eleitór provizória bazea dadus 2022 hamutuk 70.230-resin, tanba dadus 2023 sei sinkroniza.
Notísia relevante: STAE Bobonaro fó teste eskrita ba kandidatu brigadista 356
Jornalista : Sérgio da Cruz
Editór : Evaristo Soares Martins
