BOBONARO, 16 fevereiru 2023 (TATOLI)- Sekretariadu Tékniku Administrasaun Eleitorál (STAE) munisípiu Bobonaro, kinta ne’e fó teste eskrita ba kandidatu brigadista na’in-356 hodi prepara ba eleisaun parlamentár tinan 2023.
Diretór STAE Munisípiu Bobonaro, Mariano Viegas Amarál, esplika kandidatu hirak-ne’e mai hosi postu administrativu neen ne’ebé mak admitidu iha selesaun dokumentu foin lalais ne’e.
Notísia relevante: STAE Bobonaro rejista eleitór foun 450 iha janeiru
“Ohin ita halo prova eskrita ba kandidatu brigada sira, kuandu sira pasa iha prova eskrita ne’e, ita sei kontinua fali prova orál, bainhira sé mak admitidu liu iha kandidatu Brigada ita sei halo kontratu ho nia,” nia informa ba jornalista sirá iha Jináziu Maliana.
Diretór Mariano subliña, matéria iha teste eskrita refere maioria kona-bá lala’ok eleisaun nian, lei eleitorál, regra servisu inklui materia balu hosi funsaun públiku nia kona-bá direitu no devér ba funsionáriu nian.
Tuir planu STAE munisípiu Bobonaro sei kontrata brigadista na’in-150 hodi koloka kada sentru votasaun iha postu administrativu neen suku 50.
“Ita halo kontratu ho sira ba atividade eleisaun, liuliu iha sentru votasaun, edukasaun votante no enkontru komunitáriu,” nia dehan.
Nia akresenta, teste ne’e fahe ba turnu rua, iha turnu dadeer ba brigadista sira no turnu lokraik ba kandidatu pontu fokál na’in-63.
“Ita presiza ne’e pontu fokál na’in-neen hodi koloka ba postu administrativu hotu iha munisípiu Bobonaro,” nia hatutan.
Enkuantu prosesu rekrutamentu ne’e halo hanesan faze preparasaun STAE nian atu hasoru eleisaun prezidensiál ne’ebé dekreta ona hosi Prezidente Repúblika, José Ramos Horta.
Notísia relevante: STAE Bobonaro planeia aumenta sentru votasaun 17 ba eleisaun parlamentár
Jornálista: Sérgio da Cruz
Editór: Evaristo Soares Martins
