Arsénio Bano husu PDHJ-CAC akompaña prosesu distribuisaun cesta bázika iha Oé-Cusse
OÉ-CUSSE 14 marsu 2023 (TATOLI) – Prezidente Autoridade Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, husu Provedoria Direitu Humanu no Justiza (PDHJ) no Komisaun Anti Korrupsaun (CAC, sigla protugés) atu akompaña prosesu distribuisaun cesta bázika faze daruak, hodi nune’e distribuisaun ne’e bele la’o di’ak no tuir regra Governu nian.
“Ha’u husu ita-boot sira hosi PDHJ, CAC atu akompaña distribuisaun ne’e, nune’e prosesu ne’e la’o tuir regra, husu atu haree no observa, tanba ita hakarak programa ne’e tenke la’o tuir lei ne’ebé Governu prevee ona hanesan matadalan ba programa cesta bázika,” Arsénio Paixão Bano, ko’alia iha serimónia lansamentu cesta bázika iha aldeia Oésono, suku Costa Oé-Cusse.
Nune’e husu ba PNTL sira atu akompaña prosesu distribuisaun ne’e la’o di’ak no susesu.
Nune’e móshusu ba autoridade komunitária sira bele koopera tanba xefe suku sira maka rekolla dadus hamutuk ho komunidade.
“Ha’u hanoin, produtu cesta bázika sira-ne’e kompañia sira sosa duni hosi komunidade sira, tanba sasán importadu uitoan de’it, maibé sasán lokál hanesan fore, hudi, karau batar no seluk tán, ne’e inan-aman sira mak prodús, ne’ebé ha’u fiar sirkulasaun ekonomia sei akontese tán,” nia katak.
Entretantu, Programa nasionál ne’e implementa ho baze legál ne’ebé prevee iha dekretu-lei númeru 10/2022, 04 marsu, hamutuk ho diploma konjunta lubuk, liuhosi Sekretáriu tékniku, ho nia mekanizmu nafatin hanesan faze dahuluk, kada abitante hetan sasán ho montante $50.
“Tan ne’e, ha’u agradese ba koordenadór ho ekipa distribuisaun hamutuk ho xefe suku sira, tanba imi-nia servisu hamutuk hahú hosi rekolla dadus, ohin loron RAEOA bele halo ona lansamentu cesta bázika faze daruak ba povu Oé-Cusse,” nia orgullu.
Notísia relevante: Autoridade RAEOA lansa distribuisaun cesta bázika faze daruak
Jornalista: Abílio Elo Nini
Editór: Evaristo Soares Martins
