DILI, 15 marsu 2023 (TATOLI) – Ezekutivu aprova Projetu Dekretu-Lei kona-ba Saúde Animál no Kuarentena ho objetivu prinsipál sira atu proteje saúde animál no asegura produtu sira ho orijen animál ne’ebé seguru.
Aleinde ne’e, prevene moras animál nian sira no risku sira iha kuarentena ba saúde públika no ba seguransa alimentár, hodi fornese enkuadramentu loloos ida no efisiente ba atividade sira komérsiu no negósiu nian.
“Diploma ida-ne’e atu estabelese medida jerál sira saúde animál no norma espesifika sira iha ámbitu akikultura no sanidade ba animál akuátiku sira, define funsaun sira ba kestaun sira saúde veternária públika, regula medikamentu veternáriu nian no fornese sistema ida identifikasaun no rastreabilidade animál nian”, Ministru Prezidénsia Konsellu Ministru, Fidélis Magalhães, dehan ha Palásiu Governu, kuarta ne’e.
Ministériu Agrikultura no Peska sei responsavel hodi asegura ba aplikasaun medida sira iha territóriu nasionál nian, liuhusi regulamentui sira ne’ebé sei define prosedimentu no detallu tékniku sira-seluk.
Notísia relevante: Dekretu-lei Fitosanidade no Kuarentena atu proteje ai-horis
Jornalista: Antónia Gusmão
Editora: Maria Auxiliadora
