DILI, 15 marsu 2023 (TATOLI) – Konsellu Ministru aprova alterasaun datoluk ba Lei númeru 11/2009, loron 07 fulan-outubru, kona-ba Divizaun Administrativa Territóriu. Proposta lei ne’e husi Ministru Administrasaun Estatál (MAE), Miguel de Carvalho.
“Proposta lei ne’e ho objetu kriasaun sirkunkriasaun administrasaun infra-munisipál foun tolu ka eskalaun daruak, ne’ebé rezultadu hothotu husi prosesu desizaun postu administrativu sira daudaun ne’e eziste”, Ministru Prezidénsia Konsellu Ministru, Fidélis Magalhães, realsa iha Palásiu Governu.
Alterasaun dahuluk hala’o iha postu administrativu atuál Maubara, munisípiu Liquiçá, ne’ebé inklui área besik 264 km2, korresponde ba 48,7% husi territóriu munisípiu no populasaun besik ema rihun 22.
Nune’e postu administrativu ne’e fahe ba rua, Maubara ne’ebé hela ho área 132km2 no populasaun hamutuk 12.194, no Loes hela ho área 132 km2 no populasaun besik ema 9.700.
Alterasaun daruak hala’o iha postu administrativu atuál Quelicai, munisípiu Baukau, ne’ebé inklui área besik 13,7% husi territóriu munisípiu no populasaun besik 17.471. Nune’e, postu administrativu ne’e fahe ba tolu, Quelicai hela ho área 46 km2 no abitante hamutuk 7.096, Quelicai Antiga hela ho área 80 km2 no populasaun besik 5.998, no Matebian ho área 80km2 ho abitante besik 4.300.
“Konsidera katak prosesu eleisaun Parlamentu Nasionál ne’ebé la’o hela no atu permite ba Governu atuál no Ezekutivu tuirmai planeia no ezekuta medida nesesária sira ba estabelesimentu no tama ba funsionamentu administrasaun foun sira iha postu administrativu no órgaun respetivu sira. Proposta lei ne’e sei tama iha vigór iha loron 01 fulan-janeiru tinan 2024”, nia konklui.
Jornalista: Antónia Gusmão
Editora: Maria Auxiliadora
