DILI, 15 marsu 2023 (TATOLI) – Ezekutivu sira aprova pakote lejizlativu ida, kona-ba Rejime Jurídiku ba sistema nasionál edukasaun pré-eskolár, ensinu báziku no sekundáriu, aprezentandu husi Ministru Edukasaun, Juventude no Desportu (MEJD), Armindo Maia.
“Pakote lejizlativu ida ne’e atu estabelese sistema nasionál edukasaun pré-eskolár no revee sistema nasionál ensinu báziku no ensinu sekundáriu, ne’ebé regula kestaun organizasaun prinsipál sira husi nivel edukasaun sira no ensinu iha ámbitu sistema edukativu nasionál”, Ministru Prezidénsia Konsellu Ministru, Fidélis Magalhães, hatete iha Palásiu Governu.
Diploma tolu ne’e estabelese norma orientadora sira, planeamentu ba rede oferta edukativa sira, rejime administrasaun no jestaun estabelesimentu públiku sira, regra sira ne’ebé aplikavel atu estabelese partikulár no kooperativu sira, no ninia integrasaun iha rede oferta edukativa sira iha servisu públiku nian.
“Ho aprovasaun ida ne’e bainhira tama iha vigór, ensinu pré-eskolár mós hetan hanesan ensinu formál ida nasaun nian. Entaun, labarik hosi tinan 3 to’o 5, bele asesu ba pré-eskolár. Antes ne’e, voluntáriu de’it laiha sistema kobertura iha ensinu rasik. Planu ne’e di’ak”, membru ezekutivu ne’e salienta.
Jornalista: Antónia Gusmão
Editora: Maria Auxiliadora
