DILI, 15 marsu 2023 (TATOLI) – Governu aprova projetu rezolusaun kona-ba donativu ho valór rihun $60 atu fó ba Reprezentasaun Permanente Repúblika Demokrátika Árabe Saaraui, ne’ebé aprezenta husi Ministra Negósiu Estranjeiru no Kooperasaun, Adaljiza Magno.
“Apoia ne’e hodi finansia sira-nia reprezentasaun diplomátika, hodi nune’e sira bele hala’o atividade iha ita-nia rain”, Ministru Prezidénsia Konsellu Ministru, Fidélis Magalhães, esplika iha Palásiu Governu, kuarta ne’e.
Medida ne’e atu hametin filafali lasu istóriku sira ne’ebé kesi Timor-Leste ho Árabe Saaraui, bazeia ba dejezu komun hodi luta ba autodeterminasaun, iha prinsípiu solidariedade hodi luta ba libertasaun nasionál no iha direitu ba autodeterminasaun no independénsia, ne’ebé hatuur iha Konstituisaun Repúblika.
Iha Rezolusaun Parlamentu Nasionál kona-ba solidariedade no apoiu ba povu Saaraui, no iha faktu katak Timor-Leste kontribui ona, hahú kedas iha tinan 2011, funsionamentu Reprezentasaun Permanente Saaraui iha Dili. Liuhusi konsesaun subsídiu anuál ida ba ezersísiu husi ninia atividade sira iha Timor-Leste no iha rejiaun.
Iha 2022, Governu aprova ona projetu rezolusaun hanesan hodi apoia reprezentasaun permanente Repúblika Árabe Saaraui no, iha 2021, Governu aprova mós donativu hamutuk rihun $120 ba reprezentasaun permanente ne’e.
Konsellu Seguransa Organizasaun Nasoens Unidas (ONU) hasai, iha 1966, rezolusaun 22/29 hodi deklara nasaun dahuluk ne’e hodi deside ninia destinu nu’udar país.
Árabe Saaraui proklama ninia indepéndensia, iha loron 27 fulan-fevereiru 1976, hosi frente polísariu nu’udar organizasaun ida luta ba ukun rasik-an.
Jornalista: Antónia Gusmão
Editora: Maria Auxiliadora
