NASIONÁL, EKONOMIA, HEADLINE, POLÍTIKA

Ekipa kontinua halo negosiasaun ba Greater Sunrise iha Austrália

Ekipa kontinua halo negosiasaun ba Greater Sunrise iha Austrália

Ministru Petróleu no Minerál, Victor da Conceição Soares. Imajen Tatoli/Francisco Sony

DILI, 16 marsu 2023 (TATOLI) – Ministru Petróleu no Minerál (MPM), Víctor da Conceição Soares, hatete Joint Venture kontinua fali ona diskusaun ba negosiasaun Greater Sunrise, ne’ebé hala’o ona iha Perth, Austrália.

“Loos duni, negosiasaun foin lalais suspende tiha, maibé ekipa sira hahú fali ona no la’o di’ak loos. Semana rua liubá sira tuur hamutuk no iha ona progresu balun. Delegasaun ita-nian bá fali ona, ne’ebé sira kontinua fali diskusaun, entre loron 15 no 16 marsu ne’e”, ministru informa ba Agência TATOLI, iha Palásiu Governu.

Víctor da Conceição esplika kona-ba dezentendimentu entre Timor Gap ho joint venture hanesan Woodside no Osaka Gas ne’e kestaun interna komersiál nian. “Depois ita rezolve, halo mediasaun no aseita ona prosesu ne’ebé bolu concept selection. Ida ne’e mak atu determina kadoras mai ka bá, maibé kompromisu konsorsiu sira fó atensaun boot liu atu lori kadoras mai Timor-Leste. Ida ne’e maka agora diskute hela”, nia subliña.

Rezultadu husi reuniaun sira ne’e sei hein relatóriu hosi delegasaun, tanba daudaun ekipa sei halo hela diskusaun. Delegasaun Timor-Leste kompostu hosi Autoridade Nasionál Petróleu no Minerál (ANPM), ne’ebé reprezenta Governu, Timor Gap, ho petrolífera Woodside no Osaka Gas.

Notísia relevante : https://tatoli.tl/2023/01/18/ministru-petroleu-no-mineral-rekonese-prosesu-negosiasaun-greater-sunrise-paradu/

Iha loron 06 marsu 2018, Timor-Leste ho Austrália asina tratadu istóriku ida hodi estabelese fronteira marítima permanente, ne’ebé pasu ne’e marka era foun ba relasaun di’ak entre nasaun viziña ne’e.

Iha tratadu ne’e estabelese estrutura ida hodi dezenvolve hamutuk kampu gás Greater Sunrise ba benefísiu nasaun rua no tratadu ne’e reflete parseria ida entre nasaun rua ne’ebé liga ho jeografia, inklui lasu istóriku no amizade ne’ebé kle’an.

Tratadu ne’e Komisaun Konsiliasaun estabelese tuir ONU nia konvensaun ba Lei Tasi nian (UNCLOS, sigla inglés) mak dirije espésie ida ba dahuluk.

Iha momentu ne’ebá, Austrália nian reprezenta hosi Ministra Negósiu Estranjeiru, Julie Bishop no Timor-Leste nian reprezenta hosi Ministru Estadu Prezidénsia Konsellu Ministru, Agio Pereira, mak asina tratadu.

Baze ba akordu 06 marsu iha sede ONU nian estabelese artigu 2 (propriedade kona-ba petróleu no partilla reseita), katak iha proporsaun 70% ba Timor-Leste no 30% ba Austrália, se kampu sira Greater Sunrise sei dezenvolve liuhosi gazodutu ba Timor-Leste.

Maibé, iha proporsaun 80% ba Timor-Leste no 20% ba Austrália, se kampu sira Greater Sunrise dezenvolve liuhosi gazodutu ba Austrália.

Jornalista: Antónia Gusmão

Editora: Maria Auxiliadora

iklan
iklan

Leave a Reply

iklan
error: Content is protected !!