DILI, 16 marsu 2023 (TATOLI)— Inspetór Jerál Autoridade Inspesaun no Fiskalizasaun Atividade Ekonómika, Sanitária no Alimentár, Institutu Públiku (AIFAESA,I.P), Ernesto Monteiro, hateten hosi janeiru to’o marsu 2023 prosesa ona empreza ualu ba Ministériu Públiku (MP).
“Tuir ha’u-nia hatene, janeiru to’o mai marsu 2023 ne’e, empreza ne’ebé ita submete ba Ministru Públiku (MP) hamutuk ualu. Ne’ebé kona-ba ninia sansaun oinsá ida ne’e, MP mak hatene,” Ernesto Monteiro dehan ba Agência Tatoli iha Embaixada Repúblika Indonézia (KBRI), kinta ne’e.
Nia dehan, empreza ualu ne’ebé AIFAESA,I.P prosesa ba MP ne’e maihosi sira ne’ebé halo espekulasaun ba folin sasán no empreza balu la kumpre desizaun hosi AIFAESA,I.P ne’ebé halo kontrolasaun.
“Kontrolasaun ne’e signifika empreza sira iha obrigasaun bainhira iha desizaun finál ne’ebé AIFAESA,I.P fó hanesan selu koima sira tenke halo tuir. Maibé lakohi selu, ida ne’e ita prosesa hotu ba MP. Agora hein deit MP mak sei foti desizaun tuir sira-nia kompeténsia,” nia dehan.
Notisia relevante : MJ prosesa empreza nasionál no internasionál 40-resin ba MP
Aleinde ne’e, AIFAESA,I.P mós fó ona prosesu audensia ho nain hosi loza Xhin Wan iha Manleuna ne’ebe faan sasán hanesan mie sedaap aat ne’ebe sira habai halo maran faan fali no faan produtu liu prazu hanesan susu-been, no bebida non alkoólika.
“Sira agora iha prosesu audensia no signifika fó tempu loron 15 ba sira hodi bele hato’o sira-nia defeza mak tama faze instrusaun. Tanba ida ne’e tuir prosesu jurídiku nian, maibé normalmente sira sei multa koima tuir dekretu lei númeru 23/2009 kona-ba rejime infrasaun administrativa kontra ekonomia no seguransa alimentar. Multa koima ne’e hahú hosi $1.000 to’o $10.000,” Ernesto hateten.
Tanba tuir dekretu lei númeru 23/2009 ne’e, AIFAESA,I.P nia parte bele foti desizaun ba sansaun administrative. Ezemplu hanesan komersiante sira fa’an produtu liu prazu, lisensa expired, no produtu estraga ruma maka AIFAESA,I.P deteta iha kompetensia bele foti sansaun tuir lei ne’ebé iha.
Notisia relevante : AIFAESA,I.P sei prosesa empreza importadór haat ba Ministériu Públiku
Jornalista : Arminda Fonseca
Editora : Armandina Moniz
