DILI, 01 fevereiru 2023 (TATOLI)—Autoridade Inspesaun no Fiskalizasaun Atividade Ekonómika, Sanitária no Alimentár, Institutu Públiku (AIFAESA,I.P) sei prosesa empreza importadór haat ba Ministériu Públiku (MP) tanba halo espekulasaun ba folin produtu hanesan, masin-midar, bebida non alkoólika.
Inspetór Jerál AIFAESA,I.P, Ernesto Monteiro, hateten, sira-nia parte prosesa empreza importadór haat ne’e ba MP, tanba ekipa konjunta ne’ebé inklui Ministériu Turizmu Komérsiu no Indústria (MTKI), Polísia Sientífiku Investigasaun Kriminál (PSIK), Autoridade Aduaneira (Alfándega) halo inspesaun hahú iha loron 06 to’o 18 janeiru deteta sira halo espekulasaun ba folin sasan.
Notisia relevante : AIFAESA, I.P sei prosesa distribuidór rua no supermerkadu ida ba MP
“Ita halo inspesaun ba estabelesimentu hamutuk 23, distribuitór hitu no supermekadu 13 no loja tolu. Hosi númeru ne’e ekipa konjunta deteta iha distribuitór haat mak halo espekulasaun ba sasán, no ami presiza prosesa ba oin ba MP tanba konsidera halo krime,” Ernesto Monteiro koalia ba Agência Tatoli liuhosi entrevista eskluziva, kuarta ne’e.
Nia dehan, AIFAESA,I.P prosesa empreza inportadór haat ne’e bazeia ba lei númeru 4/2011 1 juñu kona-ba krime asambarkamentu no espekulasaun bandu produtu ne’ebé stok tuan sei iha no labele kontinua faan ho folin karun bainhira aproveita fali situasaun ruma.
Tanba, Timor-Leste iha lei kona-ba ba loja ditributór sira ne’ebé hasa’e folin sasán la tuir lei ida ne’e natureza krime kontra númeru 4/2011 1 juñu kona-ba krime asambarkamentu no espekulasaun entaun nia prosesu tomak AIFAESA,I.P sei entrega ba Ministériu Píbliku.
“Bazeia lei ba ne’e, ita sei prosesa sira ba Ministériu Públiku (PM), maibé kona-ba sansaun ne’e MP mak sei foti,” nia dehan.
Notisia relevante : AIFAESA,I.P halo selajem ba produtu estoke tuan iha Loza Serba Ada
Inspetór Jerál AIFAESA,I.P ne’e dehan, Timor-Leste iha ona lei hasa’e taxa ba bebida non alkoólika, masin-midar, tabaku no karreta maibé ba produtu seluk ne’e hasa’e de’it to’o 5% de’it.
Durante ne’e, tipu infrasaun ne’ebé AIFAESA,I.P halo inspesaun ba operadór ekonómiku sira ne’ebé komete krime mak hanesan, operadór ekonómiku laiha lisensa, lisensa mate maibé la renova, atividade la tuir lisensa, inderesu laloos, liu prazu, tabaku ilísitu, restaurante kondisaun la ijene, espekulasaun ba sasán no seluk tan.
Jornalista : Arminda Fonseca
Editora : Armandina Moniz
