DILI, 17 janeiru 2023 (TATOLI)— Autoridade Inspesaun no Fiskalizasaun Atividade Ekonómika Sanitária no Alimentár, Institutu Públiku (AIFAESA,I.P), tersa ne’e, halo inspesaun ba kompañia importadór Loza Serba Ada hodi halo selajem (segel) ba produtu estoke tuan hanesan, masin-midar no bebida midar.
Sup Inspetór Jerál AIFAESA,I.P, Dionisio Neto da Silva, hateten ekipa ne’ebé halo selajem ba produtu masin-midar, bebida non alkoóliku ne’e hosi ekipa konjuta intervensaun merkadu ne’ebé lidera hosi AIFAESA,I.P, hamutuk ho Polísia Nasional Servisu Investigasaun Kriminál (PNSIK), no Ministériu Turizmu Komérisiu no Indústria (MTKI) liuhosi Diresaun Regulasaun Komersiál no Protesaun Konsumidór.
Nia dehan, ekipa ba halo inspesaun ba importadór Loza Serba Ada, tanba iha loron 11 janeiru 2023 ekipa ba halo uluk ona inspesaun ba sira-nia produtu liuliu masin-midar no bebida midar sira deteta kompañia faan halo espekulasaun ba produtu sira ne’e. Momentu ne’ebá fó ona atensaun bele faan maibé ho folin anterior maibé sira la halo tuir ho nune’e ohin ekipa ba halo selajem ba sira-nia produtu.
“Produtu sira ne’ebé ohin ita mai halo selajem mak hanesan, bebida non alkóliku hamutuk 5.955 kaixa no konsege faan ona liu kaixa 50, masin-midar hamutuk saka 1.850 (faan ona saka 72) no sigaru marboro mean kaixa 1.075,” Dionísio Neto da Silva, hateten ba jornalista iha Loza Serba Ada, Bidau, Dili.
Nune’e, kona-ba sansaun ba krime sira, parte AIFAESA,I.P sei prosesu ba Ministériu Públiku (MP) no mak sei foti desizaun atu multa ka kona-ba pena prizaun.
Nia dehan, AIFAESA,I.P sei prosesa distributor ne’e, bazeia ba dekretu lei númeru 29/2011 20 juñu kona-ba presu justu, hateten marjen komersializasaun bele hetan lukru maibé labele liu hosi 10% to’o 15%, nune’e liga mós ba lei númeru 4/2011 1 juñu kona-ba krime asambarkamentu no espekulasaun bandu produtu ne’ebé estoke tuan, labele faan fali iha situasaun hanesan agora ne’e.
Iha fatin hanesan, Na’in ba Importadór Loza Serba Ada, David Jong, hateten, ekipa konjunta ne’ebé halo atividade inspesaun tanba sira-nia knaar, maibé sasán ne’ebé sira selajem tiha ne’e loloos tenke esplika klaru tiha lei ne’e atu importadór sir abele hatene no la kontra.
“Ami la simu ekipa konjunta inspesaun mai halo selajem ba ami-nia produtu. Ida ne’e ita-nia negósiu la la’o, ne’e halo ami ladun konkorda ho atividade inspesaun ne’ebé ekipa halo ne’e tanba, AIFAESA,I.P rasik seidauk esplika lei ne’ebé mak kontra no produtu ne’ebé ami faan maske hola antes maibé ami faan karun tanba ida ne’e nu’udar negósiu mak hanesan ne’e,” nia dehan.
Jornalista : Arminda Fonseca
Editora : Armandina Moniz
