DILI, 25 janeiru 2023 (TATOLI) – Ministru Justisa Tiago Amaral Sarmento, informa MJ prosesa ona empreza nasionál no internasionál hamutuk 40-resin ba Ministériu Públiku (MP) tanba la selu arrendamentu maske uza rai Estadu hodi halo atividade ekonómika iha Timor-Leste.
Iha jullu 2022, Ministru Justisa fó ona kompeténsia ba Gabinete Inspesaun Auditoria (GIA) atu halo inspesaun ba uma no rai Estadu ne’ebé kompañia nasionál no intenasionál uza hodi halo atividade maibé sira la selu arrendamntu ba Estadu.
Liuhosi inspesaun no averiguasaun ne’ebé ekipa GIA halo konsege identifika empreza nasionál no internasionál hamutuk 49 maka la selu arredamentu ba Estadu durante ne’e.
“Depois ita verifika no bolu kompañia sira ne’e mai, iha kompañia nasionál no internsionál balun maka konsege selu ona arredamentu ba Estadu. Maibé iha balun la konsege selu, tanba ne’e Ministériu Justisa halo partisipasaun ba Ministériu Públiku liuliu ba kompañia nasional no internasionál ne’ebé maka durante seidauk selu arredamentu hamutuk 40-resin”, Tiago Amaral Sarmento dehan ba jornalista sira iha Palásiu Governu, kuarta ne’e.
Governante ne’e esplika lista ba kompañia nasionál no internasionál ne’ebé maka seidauk selu arredamentu ba hamutuk 40-resin MJ submete ona lista ba Ministériu Públiku.
“Tanba ita sira hatene kompañia nasionál no internsionál ne’ebé aluga rai no uma Estadu hodi halo atividade ekonómia la selu arredamentu ba Estadu ne’e krime fraude fiskál no ita halo partisipasaun ba Ministériu Públiku”, katak nia.
Ministru Justisa fundamenta katak sei kontinua nafatin halo levantamentu ba uma no rai Estadu iha territóriu tomak hodi kontinua indentifika hira maka kompañia nasionál no internasionál uza halo atividade maibé to’o oras ne’e la selu arredamentu ba Estadu.
Jornalista : Natalino Costa
Editór : Zezito Silva
Parabéns Sr. Ministru. Ita-boot serbidu di’ak duni.